Көдьүүстээх социальнай бырайыактары ВЭФ-2025 чэрчитинэн «Губернатордар кулууптарыгар» дьүүллэһиэхтэрэ

Экэнэмиичэскэй пуорумҥа Социальнай чинчийиилэр эспиэртиир институттара (АНО ЭИСИ) кыттыылаах Уһук Илиҥҥи эрэгийиэннэр салайар быраактыкаларыгар социальнай архитектура ньымаларын киллэриигэ, ону тэҥэ Уһук Илиҥҥи федеральнай уокурук саамай көдьүүстээх социальнай бырайыактарын үөрэтиигэ аналлаах сиэссийэ ыытыллыаҕа.

«Уһук Илиҥҥи социальнай-экэнэмиичэскэй сайдыы кэскиллээх хайысхаларыттан биирдэстэрэ дьон олоҕун хаачыстыбатын үрдэтии буолар. Ол туһугар сири босхо биэрэр «Гектар» бырагыраама, чэпчэтиилээх Уһук Илиҥҥи ипэтиэкэ олоххо киирдилэр. Быраастарга, учууталларга уонна эдэр исписэлиистэргэ аналлаах куортамҥа бэриллэр дьиэ тутулла турар. Эдэр ыаллар судаарыстыба өттүттэн өйөбүл ылаллар. Биир кэлим бэрэсидьиэн субсидиятын көмөтүнэн социальнай инфраструктура саҥардыллар. РФ бэрэсидьиэнэ Владимир Путин сорудаҕынан Уһук Илиҥҥи 25 куораты уларытар улахан бырайыак олоххо киирэр.  Экэнэмиичэскэй пуорумҥа бу социальнай инструменнар көдьүүстэрин көрүөхпүт, дьон олоҕун өссө хайдах тупсарары дьүүллэһиэхпит, диэн РФ бырабыыталыстыбатын бэрэссэдээтэлин солбуйааччы — РФ бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ, Илиҥҥи экэнэмиичэскэй пуорум тэрийэр кэмитиэтин бэрэссэдээтэлэ Юрий Трутнев эттэ.

Спикердэр Уһук Илиҥҥэ дириҥ социальнай уларыйыылары киллэрэр социальнай архитектура быһаччы ньымаларын уонна инструменнарын билиһиннэриэхтэрэ, ону тэҥэ Арассыыйа таһымыгар саамай көдьүүстээх быһаарыылары элбэтиннэрии, тарҕатыы төһө кэскиллээҕин сыаналыахтара, диэн иһитиннэрэр Ил Дархан, бырабыыталыстыба пресс-сулууспата.