«Кэҕэ» киинэ ыам ыйын 8 күнүттэн көстүөҕэ

Ыам ыйын 8 күнүттэн Саха сирин бары киинэ тыйаатырдарыгар «Кэҕэ» киинэ көстүөҕэ. Бу туһунан «Сахафильм» телеграм-ханаала иһитиннэрэр.

Киинэни режиссер Евгений Николаев уһулла. Былырыын күһүн бу киинэ «НСТ Хоррор Фест»  триллер, кутталлаах киинэлэр IV аан дойдутааҕы бэстибээллэригэр кыайбыта. Киинэ кириитиктэрэ режиссер Евгений Николаев киинэтин бастыҥынан ааттаабыттара.

Киинэ аан дойду үрдүнэн элбэх бэстибээллэргэ кыттыбыта уонна хас да наҕарааданы ылбыта.

Саҥа сахалыы киинэ «Святая Анна» бэстибээлгэ устудьуоннар уонна дебютнай киинэлэр «Бастыҥ сценарий» номинацияҕа лауреат буолбута. Киинэ режиссера Евгений Николаев сценарийы Никита Давыдовы кытта суруйбуттар. Киинэ саха фольклорун кытта ыкса сибээстээх уонна дьахтар тыынын кырыыстан босхолооһун туһунан устуоруйаны көрдөрөр.