Кэҕэ, ньургуһун көмөтүнэн күнү-дьылы билгэлээҥ

Аныгы сахалар айылҕаттан тэйэн, эппит-сииммит бүөлэнэн, өбүгэлэрбит курдук тулалыыр эйгэбитин дьылы, сылы уҥуордаан көрбөт буоллубут. Саас, чуолаан, ыам ыйыгар сыһыаннаах диэн санааттан, бүгүн кэҕэ уонна ньургуһун көмөтүнэн күнү-дьылы билгэлээн, кэтээн көрүүнү билиһиннэрэбит.

— Куһаҕан дьыл буолар сааһыгар кэҕэ аҕыйахтык этэр.

— Кэҕэ быыстала суох тохтообокко эттэҕинэ, кураан күннэр уһуннук турааччылар.

— Кэҕэ кэлэҕэйдиир буоллаҕына, сотору ардыыр.

— Ньургуһун биир олохтон хойуутук (уон түөрт, уон биэс) үүннэҕинэ, кэлэр сайын өҥ, үүнүүлээх буолар.

— Ньургуһун саас эрдэлээн тыллан иһэн кэҕиннэҕинэ, кэлэр сайын тыаллаах-куустаах, хаҕыс, кураан буолар, өрт уота элбиир.

— Ньуругуһун сибэккитэ арылыннаҕына, бааһынаны хорутарга сөп буолар.

— Ньургуһун сэбирдэҕэ улахан уонна ньалҕаархай буоллаҕына, үчүгэй сайын буолар.

— Ньургуһун хойуутук тахсыбыт эбэтэр сайын сибэкки арааһа элбэх буоллаҕына, күһүнүгэр сир аһа өлгөм буолар.

— Ньургуһуна суох, үрүмэччи аҕыйах сааһыгар хара хапсыырдаах, тымныы, хаҕыс саас буолар.

— Ньургуһун, алтан от сааһыары сайын иккистээн таҕыстаҕына, өҥ сайын кэлэр.

— Ньургуһун, онтон да атын сир симэҕэ оттор атырдьах ыйыгар хойуутук тахсыбыт буолахтарына, сыһыыга үөн-көйүүр элбиир, тыаҕа тэллэй хойуутук тахсар.