Көһө сылдьар маҕаһыын улуустары кэрийэр

Саха сиригэр көһө сылдьар  маҕаһыын баар буолбут. Бу маҕаһыыны «Туесок» диэн хампаанньа тэрийбит. Маҕаһыын ыраах сытар улуустарга  сылдьар. Сыл саҕаланыаҕыттан маҕаһыын номнуо хас да улууска сылдьыбыт. Ол курдук саамай уһук сытар нэһилиэктэргэ кытта сылдьыбыт. Маҕаһыын нэһилиэнньэни бородууктанан хааччыйар.

«Сылаҥ нэһилиэгин Бэрэ учаастагын олохтооҕобун. Биһиги учаастакпыт Сылаҥтан уон км тэйиччи сытар. Учаастакпытыгар маҕаһыын да туох да суох.  Туох баар аспытын-үөлбүтүн барытын чугастааҕы нэһилиэктэргэ  баран  атыылаһабыт. Онон биһиги олус үөрдүбүт. Мантан ыла көһө сылдьар  маҕаһыыммытын күүтүөхпүт», — диэн Наталья Сивцева санаатын үллэһиннэ.

Маҕаһыын бородууктатын сыаната удамыр. Ол курдук  үүт 130 солк., 3 кг. риис — 330 солк. Маны сэргэ куруппа арааһа, үүт аһылыктар, минньигэс арааһа атыыга кэлэр эбит. Тыа сирин олохтоохторо сүрүннээн бурдугу, мокоруону, мас арыытын, кофены, чэйи хамаҕатык атыылаһаллар.  Үгүстэр кууһунан атыылаһан хаһааналлар. Бэлиэтээн суруйдахха, «Туесок» хампаанньа 2004 сыллаахха тэриллибитэ. Онон ырыынакка үлэлээбитэ 15 сыл буолбут.