Көхтөөх олохтоох Харбалаахха

Олунньу 23 күнүн, хорсун быһыы, күүстээх санаа, албан аат бырааһынньыгын көрсө «Кэскил» уһуйааммытыгар ааспыт нэдиэлэ устата «Төрөөбүт дойдуга бэриниилээх буолуу тапталтан саҕаланар» нэдиэлэ буолан ааста.

Нэдиэлэ бастакы аҥарыгар оҕолорго төрөөбүт сирдэригэр-уоттарыгар харыстабыллаахтык сыһыаннаһыы туһунан араас хайысхалаах үлэлэр ыытылыннылар. Нэдиэлэбит түмүктүүр күнүгэр, олунньу 21 күнүгэр  нэһилиэк таһымыгар успуорт инструктора Литвинцев К.Г., бибилэтиэкэ сэбиэдиссэйэ Тарабукина А.В. тэҥҥэ үлэлэһэн, Улуу кыайыы 80 сылынан, кэлэн иһэр Аҕа дойду көмүскээччилэрин күннэригэр аналлаах «Аҕа уолунуун» диэн успуорт күрэҕэ буолан ааста. Бу күрэххэ орто, улахан, бэлэмнэнии бөлөх уолаттара аҕаларыныын, убайдарынын кытыннылар. Уопсайа 9 хамаанда кыттан,  илин-кэлин түһүстэ. 5 түһүмэх түмүгүнэн, Алеша Бродников аҕата Виктор Спиридоновтыын -1 миэстэ, Шестаков Силантий, Арсений аҕаларыныын Алексей Шестаковтуун — 2 миэстэ, Макаров Владик аҕата Андрей Макаровтыын 3 миэстэ буоланнар,  кыайыы өрөгөйүн биллилэр. Атыттар араас номинацияны  ыланнар,  үөрэн-көтөн тарҕастылар. Олус сэргэх тэрээһин буолан ааста, кэлэн кыттыыны ылбыт аҕаларбытыгар, төрөппүттэрбитигэр улахан махталбытын тиэрдэбит.

Онтон олунньу 23 күнүгэр, Аҕа дойдуну көмүскээччилэр күннэригэр  норуот айымньытын дьиэтигэр «Хары баттаһыы-2025» аһаҕас күрэх буолан ааста. Күрэххэ 4 хамаанда кытынна. Улуус кииниттэн Ытык Күөлтэн 2 хамаанда  кэлбит уонна Харбалаах 2 хамаанданы туруорда.

Уопсай хамаанданан киирсиигэ Ытык Күөл-1 хамаандата кыайан, үөрүү өрөгөйүн биллэ уонна олохтоох дьаһалта туруорбут 10 тонна таас чоҕу  босхо ылар сэртипикээтинэн наҕараадаланна. 2-с миэстэни Ытык-Күөл 2-с хамаандата, 3-с миэстэни Харбалаах-1 хамаандата ыллылар. Харбалаах хамаандатын чиэһин Халыев Владислав, Слепцов Вася, Егасов Мичил  көмүскээтилэр.

Хас биирдии ыйааһын кыайыылаахтара илии тутуурдаах, өттүк  харалаах  бардылар.

Абсолютнайга Ытык Күөлтэн сылдьар ыалдьыппыт Михайлов Владимир Вячеславович кыайан, олохтоох дьаһалта уонна «Төлөн» АО туруорбут бириистэрин —  саа ботуруонунан наҕараадаланан үөрэн-көтөн барда

Манна даҕатан эттэххэ, Тааттаҕа хары баттаһыытыгар күрэх буолбатаҕа ырааппыт эбит. Ыалдьыттарбыт: «Сүүрбэччэ сыллааҕыта буолбута, бу тэрийбиккит наһаа үчүгэй!» — диэн, махтанан бардылар.

Туспа анаан махталбытын тириэрдэбит  күрэҕи көҕүлээн, сыаналаах бэлэхтэри туруорбут ААО «Төлөн» салалтатыгар уонна олохтоох дьаһалтаҕа тириэрдэбит.

Оксана АНДРЕЕВА, Күндүлээн ЛИТВИНЦЕВ, Харбалаах