Көхтөөх выпускниктар

1999-2000 үөрэх сылыгар Нам улууһугар  Аппааныга И.Е. Винокуров аатынан орто оскуолаҕа валеологическай хайысхалаах уолу эр киһилии, кыыһы кыыс быһыытынан иитии ирдэбилигэр сөп түбэһиннэрэн уолаттар уонна кыргыттар кылаастара аһыллыбыттара.

Научнай-экспериментальнай иитэр-үөрэтэр үлэбит хайысхатын биологическай наука доктора, профессор Угаров Гаврил Спиридонович салайан ыыппыта. Номнуо 20 сыл ааһа охсубут.

Үөрэппит оҕолорбут олохторугар бэйэлэрин миэстэлэрин булан, үлэһит бэрдэ, ыал ийэлэрэ-аҕалара буолан олороллоруттан үөрэбит. Сорох уолаттар улуус иһигэр сүүрэр «Мааркыс» такси өҥөтүн хааччыйаллар, нэһилиэккэ ыытыллар араас аһымал аахсыйаларга кытталлар, кинилэр ортолоругар байыаннай дьайыы кыттыылаахтара бааллар. Кинилэр бука бары үөрэммит оскуолаларын көрөн-истэн ааһаллар, үөрэппит учууталларын кытта ыкса сибээһи туталлар. Нэһилиэктэрин сайдыытыгар өрүү көмөлөһөллөр.

Өрүү, бу курдук, салгыы бэйэ-бэйэлэрин өйөһөн көмөлөсүһэн, доруобай, чэгиэн сылдьалларыгар, олоххо сыаллаах-соруктаах олороллоругар, үлэлииллэригэр, учууталларын кытта сибээстэрин быспакка сылдьалларыгар баҕарабыт, эрэнэбит.

Нина Саввина,

Аппааны, Нам.

Хаартыскалар ааптар тиксэриилэрэ