Кэлээскэҕэ олорор аҕам саастаах суолун бүөлээбиттэр

Бүгүн, балаҕан ыйын 26 күнүгэр, Дьокуускай куорат 1-кы №-дээх поликлиникатыттан тахсан иһэн көрдөхпүнэ, бачча тыаллаах күн,  аҕам саастаах кэлээскэлээх дьахтар пандуһунан түһэн баран сатаан массыынатыгар тиийбэккэ, аймах киһитин кытта хаайтаран туралларыгар түбэстим.

Эр киһи суолу бүөлээн турар массыына көлүөһэтин тэбиэлээн көрдө да, ким да тахсан массыынатын сыҕарыппата. Балыыһаҕа көрдөрөн тахсыбыт аҕам саастаах дьахтар ити курдук чаас аҥаара кэтэһэн олорбут үһү. Мин санаам буолбата, эр киһиэхэ тиийэн ГАИ үлэһиттэрин ыҥырарыгар сүбэлээтим. Эр киһи төлөпүөнүн сэрээтэ бүппүт. Онон төлөпүөммүн уларыстым. ГАИ үлэһиттэрин кытта кэпсэтэн, махтанан араҕыстыбыт.

Уопсайынан, бу поликлиника таһыгар өрүү элбэх массыына, киирии-тахсыы үгүс буолааччы. Ол эрээри пандуһунан тахсар-түһэр сири бүөлээн туруу дьон бириэмэтин ыларын  умнумуохха наада. Мантан салгыы халлаан өссө тымныйыа турдаҕа.