“Кэлэр кэм дипломата” өрөспүүбүлүкэтээҕи XVII куонкурус кыайыылааҕын быһаарыахтара

Кулун тутар 23-25 күннэригэр тэйиччиттэн көрүҥүнэн “Кэлэр кэм дипломата” оскуола үөрэнээччилэрин XVII өрөспүүбүлүкэтээҕи куонкуруһун тэрийиэхтэрэ.

Куонкурус сыала – ыччаты патриотическай тыыҥҥа, көхтөөх гражданскай көрүүгэ иитии, РФ тас бэлиитикэҕэ ыытар үлэтигэр болҕомтону ууруу.

“Кэлэр кэм дипломата” куонкурус үс түһүмэҕинэн ыытыллар: оскуола иһинээҕи, улуустааҕы уонна өрөспүүбүлүкэтээҕи. Улуустааҕы түһүмэх кэнниттэн улахан лигаҕа финалга 36, алын лигаҕа 19 үөрэнээччи киирдэ. Финалга эссе түмүгүнэн киллэрдилэр.

Өрөспүүбүлүкэ түһүмэҕэр 23 улуустан уонна Дьокуускай куораттан, уопсайа, 136 эссе киирбит.

Түмүктүүр түһүмэххэ үөрэтэр сэминээрдэр, лиэксийэлэр, уйулҕа үөрэхтэрэ (тренинг) ыытыллыахтара, эсселэрин кэпсиэхтэрэ, нуучча уонна омук тылларынан сэһэргэһиини ааһыахтара, дебаттар, оратордар искусстволарыгар куонкурус буолуоҕа.

Эссени кэпсээһин, омук тылынан сэһэргэһии уонна дебат түмүгүнэн 15 бастыҥ кыттааччыны быһаарыахтара. Кинилэр финал түмүктүүр түһүмэҕэр – оратордар куонкурустарыгар киириэхтэрэ.

Куонкурус муҥутуур кыайыылааҕар эрэгийиэн бүддьүөтүн суотугар Арассыыйа Тас дьыалаларга  министиэристибэтин дипломатическай академиятыгар бакалавриакка үөрэнэргэ тус сыаллаах миэстэ көрүллэр.

Билиҥҥитэ Саха сириттэн Дипломатическай академияны 10 киһи бүтэрбитэ уонна үөрэнэ сылдьар. Номнуо тас дойдуларга Арассыыйа дипломатическай тэрилтэтигэр үлэлии сылдьааччылар бааллар. Ону тэҥэ, урукку сылларга куонкуруска кыттыбыт, финалга тахсыбыт дьонтон өрөспүүбүлүкэҕэ да, Саха сирин тас өттүгэр даҕаны норуоттар икки ардыларынааҕы сыһыаннаһыыны кытта сибээстээх үөрэх араас эйгэтигэр үлэлиир, үөрэнэр дьон элбэхтэр.

Сүрүн наҕарааданы таһынан СӨ Тас сибээскэ уонна норуоттар дьыалаларыгар министиэристибэтэ Александр Мигалкин аатынан уонна Дьокуускай куоракка РФ Тас дьыалаларын министиэристибэтин бэрэстэбиитэлистибэтиттэн Виталий Артамонов аатынан бириистэри туттарыахтара.

Улахан кылаас үөрэнээччилэригэр “Кэлэр кэм дипломата” өрөспүүбүлүкэтээҕи куонкуруһу 2007 сыллаахха тэрийбиттэрэ. Маҥнай куонкурус 9-11 кылаас үөрэнээччилэригэр анаан ыытыллара. 2017 сылтан улахан лигаҕа (9-11-с кылаас) уонна алын лигаҕа (7-8 кылаас) буолар. Былырыыҥҥыттан төрөппүттэр уонна учууталлар көрдөһүүлэринэн алын лигаҕа 5-6 кылаас үөрэнээччилэрин эмиэ киллэрэллэр.

Куонкурус тэрийээччилэрэ — РФ Тас дьыалаларга министиэристибэтин Дьокуускай куоракка бэрэстэбиитэлистибэтэ, СӨ Үөрэҕин уонна билимин министиэристибэтэ, СӨ Тас сибээскэ уонна норуоттар дьыалаларыгар министиэристибэтэ, “Юные якутяне” өрөспүүбүлүкэтээҕи ресурснай киин.

Куонкуруска бииргэ үлэлэһэр тэрилтэлэр – РФ Тас дьыалаларга министиэристибэтин Арассыыйатааҕы дипломаттарын ассоциацията, “Интерсфера” норуот дипломатиятын сайыннарыытын уонна сомоҕолоһуутун түмсүүтэ” өрөспүүбүлүкэтээҕи уопсастыбаннай тэрилтэ.

Ил Дархан уонна Бырабыыталыстыба пресс-сулууспата.