Кэлэр кэм каадырын бэлэмнииргэ сыыппара улахан оруоллаах

“Сыыппара алмааһа” федеральнай пуорум иитинэн “Образование: создание системы подготовки будущего” сиэссийэ буолан ааста.

Психолог, үөрэх эйгэтигэр Арассыыйаҕа биир биллэр-көстөр эспиэрэ, Сбер үөрэх киинин дириэктэрэ Артем Соловейчик саамай сүрүнэ биһиги кэлэр кэмҥэ ханнык идэлэр баар буолуохтарын билэрбит буолбатах, ханнык баҕарар идэҕэ көмөлөһөөччү, ол иһигэр оҥоһуу өй баарын туһанан, киһи ханнык баҕарар баҕа санаатын олоххо киллэриэн сөп диэн тэрээһин аһыллыытыгар эттэ. Итиэннэ: “Билигин баҕа санаа уонна амбиция суолталаах. Хас биирдии киһи кыаҕа муҥура суоҕа”, – диэн бэлиэтээтэ.

Тустаах этииттэн тирэҕирэн, кэлэр кэм каадырын бэлэмнээһиҥҥэ сыыппара, оҥоһуу өй, аныгы технология оруолун тула киэҥ далааһыннаах кэпсэтии, ырытыһыы буолан ааста.

“Алгоритмика” программирование уонна математика норуоттар икки ардыларынааҕы оскуолатын судаарыстыбаннай секторы кытта үлэҕэ дириэктэрэ Станислав Косарев бэйэлэрин бырайыактарын туһунан кэпсээтэ. Үөрэх цифровой эйгэтин нөҥүө уһуйаантан саҕалаан үрдүк үөрэххэ тиийэ тиһигин быспакка үөрэтиини ситимнииллэрин этэр. “Бырайыак сүрүн соруга – сыыппара технологияларын, оҥоһуу өйү туһаныыга дириҥ сатабылы олохсутуу”, – диэн этэр. Сбер өйөбүлүнэн Саха сирин 60 оскуолатыгар тустаах бырайыагы үлэлэтэргэ бэлэмнэнии бара турарын иһитиннэрдэ.

Күн бүгүн дойдуга сыыппараҕа көһүүгэ, технология сайдыытын түргэтэтэргэ, оҥоһуу өйү олоххо киллэрэргэ тиийбэт каадыры бэлэмниир, күөн күрэстэһиини үрдэтэр улахан сорук турар. Түргэнник уларыйар ырыынак кэмигэр үөрэх саҥа ньыманы баһылыыр, сатабылы олохсутар былаһаакка буолуохтаах диэн бүгүҥҥү пуорум кыттыылаахтара ыйаллар. Маны быһаарарга аныгы технологияны бары өттүнэн туһаныы көмөлөһөр кыахтааҕын этэллэр. Саха сирэ маныаха үтүө холобурга сылдьара үөрдэр. Үөрэх уонна билим миниистирэ Нюргуна Соколова маныаха Ил Дархан Айсен Сергеевич Николаев, бырабыыталыстыба бэрэссэдээтэлэ Анатолий Семенов, федеральнай салалта суолтата улаханын ыйар.