Кэлэр кыһыны билгэлиэххэ

“Кэлэр кыһын хаһааҥҥытааҕар даҕаны тымныы буолар үһү” диэн кэпсэтии кэлин үксээтэ. Хайдах кыһын кэлиэҕин айылҕа, кыыл-сүөл, көтөр-сүүрэр көстүүтүнэн билгэлээн көрүөҕүҥ.

— Харыйа уонна бэс туорахтара аҕыйах дьылыгар ичигэс кыһын буолар

— хаар чараас буоллаҕына, кыһына тымныы буолар

— үөт күһүн хаардаахха үнүгэстэннэҕинэ, ичигэс кыһын буолар

— тэтиҥ сэбирдэҕэ күһүн сиргэ тиэрэ түстэҕинэ, кыһына тымныы, оттон умса түстэҕинэ – кыһына сылаас буолара күүтүллэр

— тымтык умайарыгар хоруолаах буоллаҕына, тымныы улахан буолар

— тымныы кыһын буоларыгар кутуйахтар уйаларын аанын күн сылытар өртүгэр оҥостоллор

— тиит көмнөҕө аҕыйах буоллаҕына, тымныы кыһын буолар

— тииҥ уйатын мас аллараа өртүгэр туттубут буоллаҕына, тымныы кыһын, үөһэ өттүгэр тутуннаҕына – ичигэс кыһын буолар

— сэбирдэх хойутаан, бытааннык түстэҕнэ, кыһына тыаллаах-куустаах, хаҕыс буолар

— сэбирдэх тымныы түһүөн иннинэ түстэҕинэ, сылаас кыһыны күүтүллэр

— сэбирдэх түргэнник, эрдэлээн түстэҕинэ, кыһын тымныы буолар

— сыа хаар түһэр буоллаҕына, от-мас көмнөҕүрэр, оччоҕо кыһына ичигэс буолар

— сайын кииһилэ элбэхтик үүннэҕинэ, кэлэр кыһын ичигэс буолар

— күһүөрү тымныы түспүтүн кэннэ, күн тахсыан иннинэ кулун түүтэ үүт курдук үп-үрүҥ кырыанан бүрүллүбүт буоллаҕына, үчүгэй кыһыны күүтүллэр

— Миитрэйэп саҕана (сэтинньи 8 күнэ) халлааҥҥа чүмэчи курдук былыттар таҕыстахтарына, чэбдик кыһыны, оттон үдүк-бадык уонна сырдыктыҥы будулҕан былыттар устар буоллахтарына, тымныы кыһыны күүтүллэр

— кымырдаҕас оргулун үрдүктүк чөмчөппүт буоллаҕына, тымныы кыһын буолар

— күтэр уйатын чараастык хастан оҥоһуннаҕына, халыҥ хаардаах сылаас кыһыны күүтүллэр

— күһүн куурусса эрдэ түүлээтэҕинэ, кэлэр кыһын ичигэс буолар

— күһүн кумаар хойутаан өллөҕүнэ, ичигэс уонна уһун кыһын буоларын күүтэллэр

— дьабарааскы элбэх оту мунньан, уйатын халыҥнык оҥоһуннаҕына – тымныы кыһын кэлэр.

(И.Сосин, И.Неустроев “Сахалыы күнү-дьылы билгэлээһиннэр” кинигэттэн).