Сыл бэлиэтинэн – сылгынан билгэлээһин

Илиҥҥи халандаарынан 2026 сыл Уот кыһыл ат сыла. Сахалар сылгынан билгэлэрэ үгүс. Онтон сүрүн билгэлэри көрүҥ. Дьэ, тугу, хайдах билгэлииллэр эбиттэрий?

— Сылгы кыһын сотору-сотору хахсайар, тыбыырар буоллаҕына, сааскыта хатааһыннаах буолар;

— сылгы кыһын хаарга сытар, күөлэһийэр буоллаҕына, күн-дьыл сылыйар, былытырар, хаардыыр;

— сылгы нуктаан, төбөтүн хаарга анньан утуйдаҕына былыт дуу, тыал дуу кэлэр;

— сылгы буорга күөлэһийдэҕинэ – соторунан ардах кэлэр;

— сылгы сайын ардах кэмигэр куотуган, киһиэхэ сүгүн туттарбат, үргүүк буоллаҕына, күн-дьыл көнөр;

— сылгы сотору-сотору кистээтэҕинэ, ардах кэлэр;

— сылгы тэбиэһирэ-тэбиэһирэ сүүрэр, оонньоколуур буоллаҕына, соторунан тыал-куус түһэр;

— сылгы үөрэ намыһах сиргэ, хотоолго тоҕуорустаҕына, тыал-куус, ардах, хаар кэлэр;

— сылгы хаһыҥырыыра элбээтэҕинэ, соторунан былытырар, ардах-хаар буолар;

— сылгы хаһыыта хайдах буолуоҕун сибиэһэй киитин өҥүнэн билэллэр: аччык дьылыгар киитэ кытархай, үчүгэй дьылыгар – хара, хаһыылаах дьылга – күөхтүҥү, хаһыыта суохха – кубархай уонна сыта суох буолар.

(И.Сосин, И.Неустроев “Сахалыы күнү-дьылы билгэлээһиннэр” кинигэлэриттэн).