Хаартыска: Анна Лебединская, СИА.
Орто үөрэх чопчу ханнык идэҕэ ыларын, онно хас миэстэ көрүллэрин туһунан иһитиннэриини тутар хамыыһыйа кулун тутар 1 күнүттэн хойутаппакка кэллиэс, тиэхиньикум саайтыгар таһаарыаҕа. Ити туһунан Үөрэх уонна билим министиэристибэтэ дойду Үөрэҕириигэ министиэристибэтин бирикээһигэр олоҕуран сырдатар.
Билиҥҥитэ орто үөрэхтэр ханнык идэҕэ ылалларын, хас миэстэ көрүллэрин, үөрэххэ туттарсааччы туох тургутууну ааһара ирдэнэрин о.д.а. иһитиннэриини, этэргэ дылы, кэтэһэн-кэтэһэн кэлтэгэй буолбуттарын кэннэ бэс ыйыгар биирдэ таһаараллар. Онтон докумуону аҕыйах сылтан бэттэх үрдүк үөрэхтэри кытта тэҥҥэ бэс ыйын 20 күнүттэн номнуо тутуллар. Оҕолор эрдэттэн быһаарыналларыгар бу атахтыыр диэн элбэх киһи этинээччи. Төрөппүттэр, абитуриеннар санаалара учуоттааммыт.
2020 сыл балаҕан ыйын 2 күнүнээҕи Орто үөрэххэ ылыы туһунан бэрээдэккэ уларытыылары киллэрэр буолбуттар. Юстиция министиэристибэтэ бирикээһи бигэргэппит. Онон тутар хамыыһыйа кулун тутар 1 күнүн хойутаппакка кэллиэс официальнай саайтыгар уонна истиэндэтигэр кэккэ иһитиннэриилэри киллэриэхтээҕин туһунан ыйыллар. Иһитиннэриигэ үөрэххэ ылыы быраабылатыттан саҕалаан төлөбүрдээх үөрэххэ, ханнык идэҕэ, хас миэстэҕэ, ханнык көрүҥҥэ, уопсай баарыгар дуу, суоҕар дуу, онно хас миэстэ көрүллэригэр тиийэ барытын сырдатыахтаахтар. Сиһилии манна ааҕыаххытын сөп.
Аны күнүскү-кэтэхтэн уонна кэтэхтэн көрүҥнэргэ кэллиэскэ уонна тиэхиньикумҥа сайабылыанньаны ахсынньы 1 күнүгэр диэри ылыахтара.
“Орто анал үөрэххэ туттарсааччы үөрэх туһунан докумуонун куоппуйатын биэриэн сөп. Ол эрээри, үөрэх туһунан докумуон оригиналын туттарыы болдьоҕо ааһыыта кэллиэс салайааччыта докумуоннарын оригиналын туттарбыттартан, ону тэҥэ, судаарыстыбаннай өҥө порталынан сайабылыанньаларын ыыппыт, үөрэх туһунан докумуон электроннай дубликатыгар олоҕуран үөрэххэ киирэрин бигэргэппит, тутар хамыыһыйа быһаарбыт (рекомендованные) дьонун үөрэххэ ылыы туһунан бирикээһин таһаарар” – диэн ыйыллар.
Үөрэххэ ылыы туһунан бирикээскэ маҥнайгы кууруска киирээччилэр араспаанньаларынан испииһэктэрэ сыһыарыллар. Сыһыарыылаах докумуон сарсыныгар тутар хамыыһыйа истиэндэтигэр ыйанар, үөрэх тэрилтэтин саайтыгар тахсар.
Докумуон 2025 сыл кулун тутар 1 күнүттэн олоххо киирэр итиэннэ 2027 сыл тохсунньу 1 күнүгэр диэри үлэлиэҕэ.
Бэҕэһээ, олунньу 10 күнүгэр, Чурапчы улууһугар И. Е. Федосеев - Доосо аатынан Дириҥ орто агро-оскуолатыгар…
Боксаҕа Арассыыйа үтүөлээх маастара, Олимпийскай оонньуулар кыттыылааҕа, аан дойду чөмпүйэнээтин үрүҥ көмүс призера Василий Егоров…
Дьокуускай куораттааҕы үөрэх управлениета иһитиннэрбитинэн, олунньу 11 күнүнээҕи туругунан, 20 үөрэх тэрилтэтигэр ОРВИнан сибээстээн быстах…
Ханнык баҕарар балыгы буһарыах иннинэ маринадка туруордахха, олус минньигэс буолар. Оттон ону эбии пиибэлээх клярга…
Суруйааччы Константин Эверстов кылгас кэм иһигэр икки саҥа кинигэтэ таҕыста. Ол курдук, ааспыт сыл ахсынньытыгар…
Фронт кирбиитигэр саха конструктордара оҥорбут сеткомёттарын бэрэбиэркэлээн көрөн баран, байыаннайдар үрдүк сыананы биэрдилэр. Бу туһунан…