Кэлэр сылга демо эксээмэни Саха сирин бары кэллиэстэригэр ыытар былааннаахтар

Ахсынньы 4 күнүгэр Саха Өрөспүүбүлүкэтигэр демонстрационнай эксээмэни тэрийии боппуруоһунан тэйиччиттэн мунньаҕы ыыттылар. Мунньахха орто анал үөрэх бырагырааматынан үөрэтэр 43 тэрилтэ бэрэстэбиитэлэ кытынна. Ырытыһыы сүрүн тиэмэтинэн кэлэр үөрэх сылыгар демонстрационнай эксээмэннэр кыраапыктарын оҥоруу буолла.

Мунньах кыттыылаахтара Үөрэх уонна билим министиэристибэтин бирикээһин пууннара туолууларыгар туһаайыллыбыт тэрээһиннэри көрдүлэр. Онно олоҕуран 2025 сыл тохсунньу 15 күнүгэр диэри демо эксээмэннэр ыытыллар күннэрин оҥорууну түмүктүөхтээхтэр. Ону тэҥэ, хас биирдии үөрэх тэрилтэтэ эксээмэн буолар миэстэтин былаһааккатын быһаарыахтаах, эксээмэн ыытыллар былаһааккаларын ирдэнэр тэрилинэн, матырыйаалынан уонна үстүрүмүөнүнэн хааччыйыахтаах.

2025 сылга өрөспүүбүлүкэ бары кэллиэстэригэр 98 идэҕэ уонна исписээлинэскэ демо эксээмэн ыытар былааннанар. Барыта 4500-тэн тахса үөрэҕи бүтэрээччи кыттыаҕа.

Саха сиригэр демо эксээмэн координатора Петр Соловьев демо эксээмэни тиэхиньиичэскэй өттүнэн чопчулааһыҥҥа, логическай көрүүлэргэ уонна эксээмэн ыытыллыытын уратыларыгар сыһыаннаах ыйытыыларга хоруйдаата. Бу туһунан Идэҕэ бэлэмниир үөрэх тэрилтэлэрин сайыннарар институт суруйар.