Кэлэр сылтан 60-тан тахса саҥа суол бэлиэтэ баар буолуоҕа

Арассыыйаҕа 2026 сылтан 60-тан тахса саҥа суол бэлиэтэ үлэҕэ киллэриллиэҕэ. Бу туһунан юрист Елена Браун иһитиннэрдэ.

«ГОСТ Р 52290-2024 стандартыгар сөп түбэһиннэрэн, 60-тан тахса саҥа суол бэлиэтин уонна табличкатын эбэр былааннаахтар. Оттон 2026 сыл тохсунньу 1 күнүттэн дойду бары сиригэр-уотугар үлэҕэ киириэхтээхтэр», — диэн Браун РИА Новости биллэрдэ.

Кини чуолкайдаабытынан, саҥа систиэмэ ордук чопчу буолуоҕа уонна саҥа көрүҥнээх тырааныспардарга туһуланар. Саҥа бэлиэлэр сатыы дьон куттала суох буолууларын хааччыйыаҕа уонна экологияны харыстыаҕа. Елена Браун эппитинэн, төгүрүк, квадрат, үс муннуктаах эбэтэр көнө муннуктаах оҥоһуллубут туспа суол бэлиэлэрин, сүрүн бэлиэлэри кытта эрэ туттуллар саҥа табличкалары, ону тэҥэ бэлиэлэр саҥа элеменнэрин киллэрэр былааннаахтар.

«„Платная парковка“ бэлиэтигэр „сыһыарыы нөҥүө төлөбүр“, „SMS нөҥүө“ курдук эбии пиктограммалар киириэхтэрэ. Ону таһынан, «Стоп-линия» туруору бэлиэтэ, «Оҥоһуу мэһэйи ааһарга сүбэлэнэр түргэн» бэлиэтэ, истэр кыахтара кэһиллиилээх дьоҥҥо суоппардар болҕомтолорун ууралларыгар «Глухонемые» табличка, суол кытыытынан турар парковка миэстэтин кэтитэ 2,5 миэтэрэттэн 2,25 миэтэрэҕэ диэри кыччатыллыаҕа», — диэтэ кини.

Санатахха, бу иннинэ суол быраабылаларын тутуһууну күүһүрдүбүттэрэ —  эрэгийиэннээҕи суолларга таһаҕас массыынатын ыйааһынынын уонна габаритын бэлиэтиир автоматическай ыйааһыннар үлэҕэ киирбиттэрэ. Ол түмүгэр ыстарааптар ахсаана биллэ элбээбитэ. Ону таһынан, бу сыл тохсунньу 1 күнүттэн саҥардыллыбыт ГОСТ күүһүгэр киирбитэ, онно олоҕуран саҥа массыына нүөмэрдэригэр Арассыыйа былааҕын булгуччулаах туруорар ирдэбил баар буолбута.