Кэлэр сылтан оҕолоох ыаллары өйүүр саҥа миэрэлэр киириэхтэрэ

2026 сыл тохсунньу 1 күнүттэн үлэни биэрээччи үлэһитин дьиэ кэргэнигэр оҕо төрөөтөҕүнэ, көмө төлөбүрүн биэриэн сөп, бу нолуога суох төлөбүр кээмэйэ 1 мөлүйүөҥҥэ диэри үрдүөҕэ диэн бэрэсидьиэн Владимир Путин эттэ.

Билигин бу нолуога суох көмө төлөбүрүн суумата 50 тыһыынча солкуобайга тэҥнэһэр. О эбэтэр, үлэни биэрээччи үлэһитин өйөөн, харчынан төлөбүрү оҥордоҕуна, бу сууматтан НДФЛ нолуога уонна страховой усунуос  тутуллубат. Бу төлөбүрү биэрэрин-биэрбэтин үлэни биэрээччи бэйэтэ быһаарар, бу кини булгуччулаах эбээһинэһэ буолбатах.

Онон биисинэс бэрэстэбиитэллэрэ социальнай эппиэтинэһи ылынан, демографическай балаһыанньаны көннөрөргө бэйэлэрин кылааттарын киллэрэллэригэр бэрэсидьиэн ыҥырда. Муус устарга үп министиэрстибэтэ бу чааһыгар Нолуок кодексыгар уларытыылары киллэрбитэ.

Маны тэҥэ, бэрэсидьиэн кэлэр сылга кыра дохуоттаах, оҕолоох ыалларга эбии көмө миэрэтэ — саҥа төлөбүр баар буоларын туһунан эттэ. Ол курдук, иккиттэн элбэх оҕолоох, намыһах дохуоттаах дьиэ кэргэттэргэ эбии төлөбүр көрүллүөҕэ.

2026 сылга хат буолууга, төрөөһүҥҥэ босуобуйа муҥутуур кээмэйэ үрдээн, 955,8 тыһыынча солкуобайга тэҥнэһиэҕэ.

Бэрэсидьиэн этэринэн, кэлэр сылтан эрэгийиэҥҥэ төрөөһүн көрдөрүүтүнэн губернатор үлэтин сыаналыыр буолуохтара. Төрөөһүн намтыы турар, онон оҕолоох ыаллары өйүөххэ наада.

Маны тэҥэ, элбэх оҕолоох ийэлэргэ Ийэ күнүгэр төлөбүрү оҥоруохха наада диэн Кириэмилгэ кэпсэттилэр.