Кэллиэгэтигэр күүһүнэн ыалдьыттыы кэлэн баран, харчы уорбут

70 тыһ.солк. уоруу туһунан холуобунай дьыаланы тэрийдилэр. Маныаха Дьокуускай куорат 41 саастаах олохтооҕо уорбаланар диэн СӨ ИДьМ пресс-сулууспата суруйар.

Харчыны уоруу туһунан Жатай олохтооҕо дьахтар иһитиннэрбит. Полицейскайдар быһаарбыттарынан, уорууга соторутааҕыта эмсэҕэлээччи дьахтарга ыалдьыттыы сылдьыбыт урукку кэллиэгэтэ уорбаланыан сөп.

Эр киһи Дьокуускайтан Жатайга күүһүнэн кэриэтэ дьахтарга ыалдьыттыы кэлбит. Дьахтар утуйарын кэтэһэн баран, кыбартыыраттан сыаналаах маллары көрдөөн саҕалаабыт. Гардеробнайтан ноутбук чехолуттан харчылаах кумааһынньыгы булбут. Онтон 70 тыһ.солк. уоран баран таксыынан Дьокуускайдаабыт, харчынан арыгы, бородуукта атыыласпыт.