Кэллиэстэргэ уонна тиэхиньикумнарга докумуону туттарыы биир кэлим күнүн биллэрдилэр

Атырдьах ыйын 8 күнүгэр Дьокуускай куоракка устудьуон аатын сүгээри сылдьар эдэр дьоҥҥо аналлаах улахан тэрээһин ыытыллаары турар — «ПрофМаршрут: старт карьеры» Саха сирин үөрэхтэрин тэрилтэлэригэр докумуону туттарыы биир кэлим күнэ.

Тэрээһин Доҕордоһуу болуоссатыгар 11:00 — 16:30 чааска диэри буолуоҕа. Манна өрөспүүбүлүкэ бары кэллиэстэрэ, тиэхиньикумнара кыттыахтара.

Үөрэххэ туттарсааччылар уонна төрөппүттэр приемнай хамыыһыйа бэрэстэбиитэллэрин кытта илэ көрсөн кэпсэтиэхтэрэ, үөрэххэ туттарсыы усулуобуйатын кытта билсиэхтэрэ уонна бары хайысха – оробуочай идэ, инженернэй исписээлинэс, педагогика, мэдиссиинэ, АйТи, өҥө эйгэтэ уо.д.а. этиилэри кытта билсиэхтэрэ. Абитуриеннар бу күн докумуону үөрэх хас да тэрилтэтигэр тэҥинэн туттарар кыахтаахтар. Маныаха пааспардарын, аттестаттарын, СНИЛС-тарын уонна 3х4 кээмэйдээх хаартыскаларын илдьэ кэлэллэрэ ирдэнэр.

Санатан эттэххэ, орто анал үөрэхтэргэ сайабылыанньаны атырдьах ыйын 15 күнүнэн тутан бүтэллэр. Бүгүҥҥү туругунан 33 742 сайабылыанньа киирбит. Бу туһунан Үөрэх уонна билим министиэристибэтин саайтыгар суруйаллар.