Көлүөнэлэри ситимниир айар куттаах Тайаана

В.Г. Белинскэй аатынан Кыраайы үөрэтэр бибилэтиэкэ бэйэтин ааҕааччыларын айылҕаттан айдарыылаах айар куттаах дьону кытта сотору-сотору көрүһүннэрэр.

Биир оннук көрсүһүү туһунан бу бибилэтиэкэ кыраайы үөрэтэр салаатын бибилэтиэкэрэ Екатерина Попова кэпсээтэ:

— Бу күннэргэ бибилэтиэкэ күндү ыалдьытынан СӨ култууратын үтүөлээх үлэһитэ, уйулҕаһыт, алгысчыт, бибилэтиэкэр идэлээх Тайаана Никифорова буолла. Кини айар үлэтин түмүгүн – кинигэлэрин билиһиннэрдэ.  Бастатан туран, Татьяна Афанасьевна кинигэлэриттэн чорботон төрөппүттэрин туһунан суруйбут ахтыытын сиһилии билиһиннэрдэ.

«Өбүгэлэрбит туһунан кинигэ оҥорон, ыччаттарбытыгар хаалларыы —  көлүөнэни ситимниир иэс», — диэн бэлиэтээтэ алдьыппыт.  Оҕолорго, учууталларга, кырыйыан баҕалаахтарга анаан хас да кинигэни, методическай пособиелары таһаартарбыт. Кинигэлэр ис хоһоонноро олус интэриэһинэй уонна иитэр-үөрэтэр аналлаахтар. Бу Тайаана бибилэтиэкэр уонна уһуйааччы-маастар буолан үлэлээбит үлэтин түмүктэрэ.

Мустубут дьон Тайаанаттан оҕону иитии, алгыстар тустарынан, олоххо көрүүлэрин, ыраастаныы, атын дойдуларга дьикти дьарыктаах дьон, сиэри-туому тутуһуу туһунан ыйыталастылар.

Уйулҕаһыт киһи олоҕор буолар араас түгэннэртэн быыһыыр харысхалларын, алгыстаах оҥоһуктарын көрдөрө-көрдөрө кэпсээбитэ ааҕааччыларбыт болҕомтолорун тарта. 1996-2014 сыллар усталарыгар Тайаана туһунан уонна кини ыстатыйаларын Дьокуускай бибилэтиэкэлэрин ситимин библиографтара Татьяна Купоросова уонна Мария Иванова анаан мунньан, таҥан хомуурунньук оҥорбуттара.

Ааҕааччы Дария Бугаева Тайаанаҕа махтал тылларын анаата: «Чугас киһим ыарахан кэмигэр Тайаана алгыһа тиийэн, билигин дьоллоохтук олорор. Кини алгыһын истиэнэҕэ билиҥҥэ диэри ыйаан туруорар», — диэн махталын тиэртэ.

Ити курдук, Тайаананы кытта көрсүһүүгэ кэлбит ааҕааччылар билиилэрин хаҥатан, бэркэ сэргэхсийэн бардылар.