Көмө барыта байыастарбыт тустарыгар оҥоһуллар

Дойдуга буола турар быһыыны-майгыны өйдөөн, Саха сирин дьоно-сэргэтэ байыаннай дьайыыларга сылдьар уолаттарбытыгар анаан араас хабааннаах көмөнү оҥороллор. Кыратыттан кырдьаҕаһыгар тиийэ сэмэй кылааттарынан кыайыыны уһансаллар.

Дьокуускай куорат Дьахталларын лигата ааспыт сыл атырдьах ыйыттан «Саха волонтердара» хамсааһыҥҥа барыта 214 700 солк. үбүнэн көмөнү ыыппыта. Онно бастакы харчынан көмөнү Антонина Степановна Титова оҥорон, биир санаалаахтарын үтүө дьыалаҕа көҕүлээбитэ.

Ол курдук Автодорожнай, Гагаринскай, Губинскай, Промышленнай, Сайсары, Октябрьскай, Строительнай, Центральнай уокуруктар, Табаҕа, Тулагы, Пригороднай, Маҥан сэлиэнньэтин Дьахталларын сэбиэттэрэ бэйэлэрэ тикпит таҥастарын-саптарын атыылаан, кэнсиэртэри тэрийэн, маастар-кылаастары ыытан киллэрбит үптэрин көмөҕө ыыталлар. Кинилэр өссө байыаннай дьайыылар кыттыылаахтарыгар анаан харысхаллары оҥорорго маастар-кылаастары тэрийэллэр.

Дьокуускай куорат 26 №-дээх оскуолатын 4-с кылааһын үөрэнээччитэ Сандаара бэйэтин баҕатынан «Саха волонтердара» хамсааһын пуондатыгар «копилкатыттан» харчытын, оттон үрдүкү кылаас үөрэнээччитэ Айсен куораттааҕы хакатон күрэххэ кыттан, кыайыылаах тахсан ылбыт бириэмийэтин ыыттылар.

Сивцевтэр дьиэ кэргэттэрэ бааһырбыт байыастарга  анал тэллэхтэри атыылаһан тириэртилэр.  «Радуга» оҕо саадын кырачааннарын хора патриотическай ырыалары ыллаан, байыастарбыт түргэнник үтүөрэллэригэр баҕа санааларын ыыттылар.