“Көмө, өйөбүл баар”

Нам улууһун Хамаҕатта нэһилиэгин олохтооҕо 73 саастаах Зоя Исаевна Осипова уола Семен Иванович, сиэнэ Айсен байыаннай дьайыы кыттыылаахтара буолаллар.

— Байыаннай дьайыы кыттыылаахтарын дьиэ кэргэннэригэр араас көмө, өйөбүл өрөспүүбүлүкэ, дойду таһымыгар элбэх. Уолум быстах хомуурга түбэһэн ыҥырыллыбыта, — диэн кэпсиир Зоя Исаевна. — 2023 сыллаахха бааһыран Москва госпиталыгар киирбитигэр, “Бэс Чагда” санаторийга бэйэбэр уонна миигин арыаллаан барбыт кыыспар Екатеринаҕа босхо путевка көрүллэ охсон, 18 күн устата уолбун ыарыылаан, көрөн кэлбитим. Итиннэ улууһум, нэһилиэгим баһылыктара, түөлбэм дьоно бэрт түргэнник үп-харчы хомуйан көмөлөспүттэригэр улаханнык махтанабын.

Биһиги нэһилиэктэн элбэх оҕо байыаннай дьайыыга сылдьар. Кинилэр төрөппүттэригэр болҕомто куруук баар. Холобур, олохтоох дьаһалта өттүттэн сыл аайы муус аҕалан биэрэр, хаардарын күрдьэллэр, оҕуруот аһа түҥэтэллэр. Былырыын дьиэбэр хаар уута киирбитигэр, муостатын оҥорон, буор кутан биэрбиттэрэ, онтон да атын көмөлөрө баһаам. Оҕолорбут эрэ этэҥҥэ эргиллэн кэлэллэригэр баҕарабын.