Татьяна Олесова: «Көмө оҥоһулла турар»

Ньурба улууһугар бэтэрээннэр сэбиэттэрин бэрэссэдээтэлэ Т.П.Олесова байыаннай эпэрээссийэҕэ кытта сылдьар биир дойдулаахтарын хас биирдии дьиэ кэргэнигэр куратордар, психологтар сыһыарылланнар, үлэ тэрээһиннээхтик барарын, байыаннай сулууспалаахтарга уонна кинилэр дьиэ кэргэттэригэр оройуон өттүттэн өйөбүл, көмө ыытылларын туһунан кэпсээтэ, быстах ыҥырыынан барбыт дьону сэргэ, улуус ыччаттарын ортотуттан Ийэ дойдуга суоһуур кутталы туоратыыга баҕа өттүнэн барбыттар баалларын бэлиэтиир.

— Быстах хомуурга уонна баҕа өттүнэн барбыт дьонҥо, кинилэр дьиэ кэргэттэригэр улуустан көмөнү оҥоруу салҕана турар. Улууска байыаннай сулууспалаахтар дьиэ кэргэттэрин уопсай ахсааныттан уон биэһэ элбэх оҕолоох дьиэ кэргэн. Баларга хас биирдиилэригэр куратордар сыһыарыллан үлэлиир буоланнар, дьиэ кэргэҥҥэ үөскүүр боппуруостар тута быһаарыллан иһэр кыахтаахтар. Волонтёрдар тыһыынча кэриҥэ сайаапканан араас өрүттээх көмөнү оҥордулар. Байыаннай сулууспалаахтар олорор дьиэлэригэр хапытаалынай өрөмүөнү ыытыыга уонна дьиэҕэ толору хааччыллыыны киллэриигэ анал бырагыраама үлэлиир. Ол быһыытынан ити үлэлэри ыытыыга хамыыһыйа быһаарыытынан квота быһаарыллан, 200-түү тыһыынча солкуобай бэриллиэҕэ. 17 нэһилиэккэ улуустан анаан-минээн тахсан байыаннай сулууспалаахтар дьиэ кэргэттэригэр кэлим көмө оҥоһуллубута, исписэлиистэр биирдиилээн дьоҥҥо сүбэ-ама, быһаарыы биэртэрэ.
Мобилизованнай дьон кэргэттэригэр дастабырыанньа оҥоһуллубута. Онон сир учаастагын нолуогуттан босхолонорго, Ньурбаҕа АТП тэрилтэ тырааныспарыгар босхо сылдьалларыгар кыах бэрилиннэ. Култуура тэрилтэлэригэр кэнсиэртэргэ, испэктээктэргэ, түмэллэргэ босхо сылдьыы, мэдиссиинэ тэрилтэлэригэр уочарата суох анаалыстары туттарыы, көрдөрүү, үлэҕэ киирээччи мэдиссиинэ көрүүтүн босхо ааһыыта тэрилиннэ. Оҕо саадыгар сылдьыы иһин саллаат оҕото төлөбүртэн босхолонуута, оҕо оскуолаҕа босхо аһааһына олоххо киирдэ. Күн бүгүн улуус үөрэҕин тэрилтэлэригэр 53 байыаннай сулууспалаах дьиэ кэргэниттэн барыта 65 үөрэнээччи үөрэнэ сылдьар. Уһуйааннарга 27 байыас дьиэ кэргэниттэн 31 оҕо сылдьар. 7 оҕо «Сосновый бор» лааҕырга сынньаммыта, аны сайын 20 оҕо ити лааҕырга, 17 оҕо “Сир уустара” лааҕырга сынньана барыахтара.
Төрөөбүт дойдуларыгар күүс-сэниэ ылаары кылгас уоппускаларыгар 20 байыаннай сулууспалаах уолатбут кэлэ сырытта, байыаннай эпэрээссийэ биир кыттыылааҕа доруобуйатын туругунан сулууспаттан босхолонно. Уоппускаҕа кэлэр уолаттарбытын итиитик-истиҥник көрсөн, сылаас наадалаах таҥас-сап, аптечка, саха быһаҕа, сахалыы харысхал уо.д.а. биэрэн, чиэстээн-бочуоттаан атаарбыппыт.
Оройуонтан саллааттарга аналлаах таҥас, экипировка арааһын тигэн, наадалаах туттар малы-салы, гуманитарнай көмө хомуйан, илдьэн тиксэрии бара турар. Улууспут анал дьаһалынан бигэргэммит балаһыанньаҕа олоҕуран, “Аһымал санаа пуондата” тэриллэн үлэлиир. Бу пуондаҕа улуус тэрилтэлэрэ, уопсастыбаннай түмсүүлэрэ, дьоно-сэргэтэ, ыччаттара көмөлөһө сылдьаллар. Ол курдук, холобур, бу күннэргэ Ньурба оройуонун култуураҕа департаменын салалтатынан, улууспут култууратын үлэһиттэрэ муус устар 8 күнүгэр байыаннай сулууспалаахтарбытыгар көмөлөһөр сыаллаах Дьокуускайга оһуокай күрэҕин тэрийэн ыытыахтаахтар. Салгыы, муус устар 10 күнүгэр А.Е.Кулаковскай-Өксөкүлээх Өлөксөй аатынан култуура дыбарыаһыгар көрөөччү дууһатын туппут «Алгыстаах илдьит. Хотойдуу кынатыҥ хорсуннук көттүн диэн…» аһымал кэнсиэртээх тэрээһини ыытыахтара. Култуура үлэһиттэрин ити тэрээһиннэриттэн киирбит үп пуондаҕа бэриллиэ.
Бу курдук ньурбалар араас өрүттээх тэрээһиннэрин нөҥүө, көмө оҥоһулла турар.