Елена Лукьянова: «Көмөлөһүү дьону түмэр айылгылаах»

Нерюнгри оройуонан дьокутааттарын Сэбиэтин IV ыҥырыытын дьокутаата, оройуон дьокутааттарын Сэбиэтин экологияҕа, доруобуйа харыстабылыгар, аҕыйах ахсааннаах норуоттарга уонна урбаан дьыалатыгар кэмитиэтин бэрэссэдээтэлэ, «СӨ норуоттарын Ассамблеята” өрөспүүбүлүкэтээҕи уопсастыбаннай хамсааһын Нерюнгритааҕы олохтоох салаатын бэрэссэдээтэлэ, Нерюнгритааҕы «Килиэп» ХЭТ салайааччыта Елена Лукьянова салайар тэрилтэтэ, тус бэйэтэ байыаннай сулууспаҕа барбыттарга уонна кинилэр дьиэ кэргэттэригэр ааспыт сыл сааһыттан көмөтүн итиэннэ көмөнү оҥоруу суолтатын туһунан саайт ааҕааччыларыгар кэпсээтэ:

— Ааспыт сыл муус устарыгар гуманитарнай көмө хомуйаммыт «Добровольцы» диэн олохтоох уопсастыбаннай тэрилтэҕэ илдьэн туттарбыппыт. Онтон кэлин байыаннай сулууспалаахтарбытыгар анаан туох наадатынан көрөн булан-талан, атыылаһан баран, ол көмөбүтүн оройуоммут баһылыга Роман Михайлович Щегельняк Амур уобалаһыгар бэлэмнэниини бара сылдьар кэмнэригэр уолаттарбытын көрсө барарыгар илдьэн тиксэрбитэ.

Быстах ыҥырыынан сулууспалыы сылдьар саллааттарбыт дьиэ кэргэттэригэр көмөлөһө олоробут: соторутааҕыта килиэп собуотуттан пирогтары, бурдук, саахар куулунан илдьэттээн биэрбиппит, Саҥа дьылга оҕолорго Куукула театрыгар остуоруйа көрөллөрүгэр билиэттэри, бэлэхтэри туттартаабыппыт.

Биһиги улууспутугар маннык көмөнү үгүс дьон оҥорор. Холобура, «Элит-пассаж» маҕаһыын хаһаайына саллааттарбыт дьиэ кэргэттэрин чилиэннэригэр сабыс-саҥа дублёнкалары, бэргэһэлэри биэрэн көмөлөспүтүгэр тус бэйэм илдьэн туттарсыбытым. Сорох сөп түбэспэтэҕи «Добровольцы» Кииҥҥэ илдьэн биэрбитим. Бу Киини кытта биһиги ыкса сибээстэһэн үлэлиибит – холобура, куул, мөһөөччүк тиийбэт түгэнигэр куруук биэрэ олоробут.

Оройуон дьокутаата буоларбынан улуус дьокутааттарын кытта гуманитарнай көмөнү тэрийии, атыылаһыы, тиэрдии боппуруостарыгар бииргэ үлэлиибит. Дьокутааттар маннык аахсыйалары өрүү өйүүллэр, үбүнэн эрэ буолбакка, дьыаланан көмөлөһөн, кытта сылдьаллар.

«Килиэп» ХЭТ салайааччыта буоларбынан Нерюнгри оройуонун баһылыгын көҕүлээһининэн ыытыллыбыт «Баҕа санаа Дьуолката» Саҥа дьыллааҕы аһымал аахсыйатыгар кыттаммын, быстах ыҥырыынан сулууспалыы барбыт саллаат оҕото Тымныы оҕонньортон көрдөһүүтүн толорбутум миэхэ биир туспа үтүө өйдөбүл буолар.

Бу улахан суолталаах уонна наадалаах дьыалалар. Биһиги бары кыах, күүс тиийэринэн бу уустук кэмнэргэ саллааттарбытыгар, кинилэр дьонноругар, ордук оҕолоругар көмөлөһүөх тустаахпыт: аҕалара кый ыраах баар, оттон биһиги аттыларыгар сылдьабыт, кинилэр биһиги өйөбүлбүт, көмөбүт баарын билиэхтээхтэр. Көмө дьону түмэр айылгылаах. Маннык холобуру үүнэр сүһүөх ыччаппыт көрө сылдьан, үтүө быһыыга уһуйуллар. Кинилэр биһиги кэлэр кэскилбит. Оттон кэлэр кэм туһунан билигин кыһалларбыт эрэйиллэр.