Көмпүүтэр кулуубуттан төлөпүөн уорбут устудьуон тутулунна

Саха сиринээҕи ИДьМ сулууспатын 2№-дээх полиция отделын дьуһуурунай чааһыгар киин куорат олохтооҕуттан биллибэт киһи төлөпүөнүн уорбутун туһунан тыллаабыт.

Суһал-көрдүүр дьаһалларынан холуобунай ирдэбил үлэһиттэрэ Дьокуускай куорат биир үөрэх кыһатын устудьуонун туттулар. Силиэстийэ быһаарыытынан, уорбаланааччы киин куорат Каландарашвили аатынан уулуссаҕа көмпүүтэр кулуубугар сылдьыбыт. Онно кини остуолга төлөпүөн сэрээттэнэ сытарын бэлиэтии көрбүт уонна ким да көрбөтүнэ уорарга быһаарыммыт. Уорбаланааччы быһаарбытынан, төлөпүөнү харчыга наадыйан уорбут, ол эрээри атыылаабатах. Төлөпүөнү хаһаайыныгар төнүннэрдилэр. Холуобунай дьыала тэрилиннэ. Уорбаланааччы икки сылга диэри болдьоххо көҥүлэ быһыллыан сөп.