«Көмүлүөк» үөрүүлээх тэрээһинэ уонна кэрэ быыстапка

Өрөспүүбүлүкэбит уопсастыбаннай үһүс саас оскуолата ахсынньы ый 25 күнүгэр 2012 сыллаахха тэриллибитэ.

Бэрэсэдээтэлинэн Прядезникова Пелагея Юрьевна ананан, күн бүгүҥҥэ диэри аҕам саастаахтарга араас тэрээһиннэри тэрийэр, күрэстэри ыытар, доруобуйаларыгар болҕомтону уурууга үлэлэһэр. Ол иитинэн, доруобуйаны бөҕөргөтүүгэ, чэбдигирдэр күнүскү сынньанар-эмтиир профилактикалыыр килииникэ сылын аайы аҕам саастаахтары көрөр-истэр.

 

Онтон биһиги улууспутугар  үһүс саас оскуола биир бастакынан 2012 сыллаахха тэриллибитэ. Онно аан бастаан Бурнашева Домна Николаевна салайбыта. Билигин салайааччынан Готовцева Матрёна Гаврильевна үлэлиир. Түмсүү хара бастакыттан бастыҥнар ахсааннарыгар сылдьар. Улууспут үгүс нэһилиэктэригэр, үһүс саас оскуолатын филиаллара тэриллэннэр, интэриэстэринэн араас куруһуоктар, маастар-кылаастар тиһиктээхтик ыытыллаллар.

Бороҕон нэһилиэгэр “Көмүлүөк”  үһүс саас оскуолата 2015 сыллаахха тэриллэн, быйыл уон сыллаах тэрээһиммитин үрдүк таһымҥа бэлиэтээтибит. Кэлбит ыалдьыттарбытын арыылаах алаадьынан, саламаатынан, быыппаҕынан көрүстүбүт. Тэрээһин үөрүүлээх аһыллыытын алгыс тылынан арчылаан, аал уоту арыылаах алаадьынан, саламаатынан айах тутан, сылгы үрүҥ сиэлинэн сыт таһааран,  сиэри-туому СӨ култууратын туйгуна, нэһилиэкпит “Аал уот” бэтэрээннэрин түмсүүтүн салайааччыта Петр Егорович Черкашин ыытта.

«Түмсүү» сынньалаҥ киинин фойетыгар «Көмүлүөкпүт” уон сыллаах үлэтин сырдатар кинигэ быыстапката, талба талааннаах  иистэнньэҥмин, улуус норуотун маастара Сардаана Иннокентьевна уус-уран оҥоһуктара, “Ньургун Боотур”  олоҥхо дьоруойдарын кылынан-сиэлинэн паннота , бастыҥ тэлгэһэлээх, оҕуруотунан, сибэккинэн утумнаахтык дьарыктанар, иискэ ылсан үлэлэһэр Ирина, Петр Черкашиннар быыстапкалара, Татьяна Ксенофонтова араас дойду чаанньыктарын  кэллиэксийэтэ, Анна Алексеева, Галина Габышева оҕуруонан оҥоһуктара, эмтээх отторо-мастара, талба талааннаах иистэнньэҥнэр Татьяна Габышева, Наталья Петухова уран оҥоһуктара, хоббилара  быыстапкаҕа көрдөрүүгэ туран хараҕы сымнаттылар, дьон-сэргэ болҕомтотун тартылар.

Ыраахтан кэлбит ыалдьыттарбыт бэйэлэрин үлэлэрин эмиэ көрдөрдүлэр. Ол курдук, кыбытыгынан тигэн, быысабайдаан тикпит толору ат симэҕин кэмпилиэгин Ирина Дьяконова аҕалбыт. Олбохтору, көбүөрдэри Светлана Константинова аҕалан көрдөрдө. Кыл-сиэл оҥоһуктарын, сэлээппэлэри, дэйбиирдэри, сөрүөнү Альбина Колесова ууран кэчигирэттэ. Кыл-сиэл, туос тойуга оҥоһуктарынан Маргарита Пестерева кытынна. Талба талаанынан хабахтан суумкалары, бэргэһэни тигэр, сөрүүкэтэн сапсынар тэриллэри оҥорор дьарыктаах  Анисия Дмитриева, кыбытыгынан дьарыктанар Евдокия Гоголева уо.д.а. үлэлэрэ быыстапканы киэргэттилэр.

Мустубут бары дьоҥҥо анаан улахан экраҥҥа “Көмүлүөк” үһүс саас оскуолатын үлэтэ, ситиһиилэрэ  медиапрезентациянан сырдатыллыбыта олус табылынна. Салгыы эҕэрдэ бастыҥнара этилиннилэр, махтал суруктар, өйдөбүнньүк бэлэхтэр туттарылыннылар.

Үлэни-хамнаһы бар дьоҥҥо көрдөрүү эмиэ биир уратынан буолла. Ол курдук, нэһилиэкпит көмүс тарбахтаах иистэнньэҥэ, “Көмүлүөк” үһүс саас оскуола чилиэнэ, улууска ыытыллыбыт дьиэ кэргэнинэн сахалыы таҥас күрэҕин «Кылаан чыпчаал” үрдүк аатын кыайыылааҕа  Габышева Анастасия Гаврильевна түүлээхтэн, сукунаттан тикпит дьахтар, эр киһи, кыыс, уол сахалыы кэмпилиэктэрин, дьахтар халадаайдарын, өттүк симэхтэрин аймах-билэ дьоно, сиэннэрэ, үһүс саас оскуола чилиэттэрэ сценаҕа тахсан көрдөрдүлэр. Маны сэргэ, норуот маастара Сардаана Иннокентьевна  “Көмүлүөк” үһүс саас оскуола чилиэттэрин  кыл-сиэл дьарыгар уһуйан өрбүт таблетка бэргэһэлэрин, дэйбиирдэрин, уо.д.а. оҥоһуктарын үһүс саас оскуола чилиэттэрэ дьоҥҥо билиһиннэрдилэр.

Тэрээһиммитигэр көмөлөспүт, киэргэппит, өйөбүл буолбут, эҕэрдэлэрин тиэрдибит дьоммутугар-сэргэбитигэр махтанабыт. Бу курдук өйүүр, тирэх буолар дьонноох буоламмыт үбүлүөйдээх тэрээһиммит үрдүк таһымҥа ааста. Сааһырдыбыт диэн олорон хаалбакка, талба талааҥҥытын уһугуннаран, сөбүлүүр дьарыккытыгар ылсан сиэдэрэй үлэлэргитинэн дьону сөхтөрө-үөрдэ сылдьыҥ.

Светлана Прудецкая,

бибилэтиэкэр, үһүс саас оскуола салайааччыта

Тумул, Уус Алдан.

Хаартыскалар С.Прудецкая тиксэриилэрэ