Көмүс дуйдаах күһүҥҥэ көҕөрдүү үлэтин үгэнэ

Өр сылларга эргэ хаарбах дьиэҕэ олорбут Өрөспүүбүлүкэтээҕи (коррекционнай) интэринээт-оскуола үс сыллааҕыта үс этээстээх таас саҥа дьиэҕэ киирбитэ. Бу баай устуоруйалаах, туруу үлэһит дьонноох оскуола.

Оскуолаҕа иитиини таһынан, оҕолору сылаастык-сымнаҕастык такайан, үлэҕэ, кэрэни кэрэхсииргэ үөрэтэллэр. Аар айылҕабыт барахсан көмүс дуйдаах күһүнэ тиийэн кэллэ, сири-дойдуну бүтүннүү суулаан, кэрэ көстүүлээх кэмигэр Өрөспүүбүлүкэтээҕи (коррекционнай) интэринээт-оскуола үлэһиттэрэ тиэргэннэригэр тупсарыы үлэтин ыыттылар. Үлэни тэрийэр дьоҕурдаах, айар-тутар дьону көҕүлүүр талааннаах, өр сылларга бу оскуолаҕа үлэ учууталынан үлэлээбит Ньургуйаана Румянцева тупсарыы, көҕөрдүү үлэтин туһунан кэпсээтэ:

— Бу оскуолаҕа үлэлээбитим 22-с сылым. 10-н тахса сыл, бэйэм баҕабынан, оскуола иннигэр сибэкки олордор буолбутум. Биэс сыл анараа өттүгэр саҥа оскуолаҕа киирэрбитигэр тупсарыы үлэтигэр хамыыһыйа тэриллибитэ. Оччолорго уонтан тахса киһини бэйэм таламмын, хамыыһыйаҕа киллэрбитим. Сыл аайы оннук үүнээйигэ сыһыаннаах дьону хамыыһыйаҕа киллэрэн испитим, инньэ гынан билигин 20-бит. Ол сылдьан оҕолору кытта саҥа оскуолаҕа киириэхпит икки сыл иннинэ, оскуолалар ситимнэрин куонкуруһугар таас оскуолабыт тулатын тупсарыыга бырайыак оҥороммут көмүскээммит, миэстэлэспиппит. Оскуолабыт дириэктэрэ Анатолий Федоров, итдэтинэн география учуутала буолан, оту-маһы сөбүлүүр, бу көҕүлээһиммитин күүскэ өйүүр. Дириэктэр сүбэһитэ,  интэринээт сэбиэдиссэйэ Изольда Новгородова эмиэ бэйэтинэн тылланан тахсан, туох баар тупсарыы, көҕөрдүү тэрээһинигэр көмөлөһөр. Оскуолабыт тулатыгар былырыын 17 устуука дьаабылыка, быйыл Улуу Кыйаыы 80 сылыгар анаан 13 устуука сирень мастарын олортубут. Икки сыллааҕыта 200-н тахса саһархай акация олордубуппут. Ону таһынан сыл аайы үс этээһинэн оскуолаҕа сибэкки олордобут. Сайыҥҥы өттүгэр хамыыһыйам дьоно 20-лии күҥҥэ эппиэтинэс ылан көрөллөр, бэрийэллэр. Сайынын Үөрэтэр куорпуска хос сибэккилэрин бэйэм көрөбүн, таска үүнэллэри бэс ыйын саҥатыгар бары түмсэн, үөрэ-көтө тахсан олордобут. Эһиил сарбынньах (рябина), күөх харыйа олордор былааннаахпыт. Хамыыһыйам дьоно олус көхтөөхтүк үлэлииллэр. Ити курдук  бэйэбит оскуолабыт иһигэр тупсарыы, көҕөрдүү үлэтин чэрчитинэн, «Подари цветок школе» аахсыйаны ыытабыт, төрөппүттэрбит, кылаас салайааччылара көхтөөхтүк кытталлар, кинилэргэ махталбын тиэрдэбин. Бу күннэргэ водопровод тардаары сылдьабыт, оччоҕо мастарбыт хамсыы-хамсыы үүнүө этилэр. Хамыыһыйабытыгар учууталлар, техүлэһиттэр бааллар. Түгэнинэн туһанан хамыыһыйам дьонугар, чуолаан техүлэһиттэргэ уонна суоппарбытыгар махтанабын, кинилэр көмөлөрө төһүү күүс буолар.