“Көмүс кумах сүүрүүлэрэ” ат сүүрдүүтэ буолла

Ааспыт өрөбүлгэ Өлүөнэ өрүспүт кумах кытылыгар, Өлүөхүмэ улууһугар ат сүүрдүүтүн сезонун аһар төрдүс төгүлүн “Көмүс кумах сүүрүүлэрэ” сааскы күрэхтэһии буолан ааста. Ыҥырыыбытын ылынан улууспут 6 нэһилиэгиттэн (1-Нөөрүктээйиттэн, 2-Нөөрүктээйиттэн, Кээччиттэн, Өлүөхүмэ сэлиэнньэтиттэн, Үҥкүртэн, Кыыллаахтан) барыта 39 сылгыны кытыннардылар. Тыҥааһыннаах эрдэ биллэриллибит 6 дистанцияҕа 800 м., 1200 м., 1600 м. үс сүүрүү уонна 3200 м. сүүрэн 6 кэмпилиэк  наҕараада оонньонно. Ону таһынан, муҥутуур кыайыылааҕы быһаарар сүүрүүгэ — 2400 дистанцияҕа икки ат кытынна.

Түмүк бу курдук:

800 м.

1 м – Александр Баля ( 1-Нөөрүктээйи),

2 м. Григорий Одинцов (Өлүөхүмэ с.)

3 м. Всеволод Кудрин (Кээччи),

1200 м.

1 м. Леонид Егомин (Кыыллаах),

2 м. Дмитрий Бастыров (Кыыллаах),

3 м. Владимир Янков (Өлүөхүмэ с.).

1600 м. сиэнчэр

1 м. Иван Корнилов (Кыыллаах),

2 м. Михаил Терентьев (2-Нөөрүктээйи),

3 м. Иван Корнилов (Кыыллаах).

1600 м. саха аттара

1 м. Василий Жирохов (1-Нөөрүктээйи),

2 м. Владимир Нахов (Кыыллаах),

3 м. Федор Убабытов (Кыыллаах).

1600 м.

1 м. Григорий Одинцов (Өлүөхүмэ с.),

2 м. Алексей Семенов (Кыыллаах),

3 м. Игорь Корнилов (Кыыллаах)

3200 м.

1 м. Вячеслав Нарахаев (Кыыллаах),

2 м. Владимир Янков (Өлүөхүмэ с.)

3 м. Иван Корнилов (Кыыллаах).

Муҥутуур кыайыылааҕы быһаарыыга 2400 м.  Медалек  тэҥнээҕин булбата. Кубогынан уонна 20 тыһ. солк. наҕараадаланна. Түгэнинэн туһанан, бу да сырыыга кыайыылаах тахсыбыт Медалекпутун уруйдаан-айхаллаан кыыллаахтар ааттарыттан махтал сурук аахтыбыт, кыайыылаах попонатын кэтэттибит, В.В.Торговкин туруорбут тарбыйах анал бирииһин туоһу суругун туттардыбыт.

Бастакы миэстэлээхтэргэ 20 тыһ. солк., иккис миэстэлээхтэргэ 15 тыһ. солк. сэртипикээттэр, 3 миэстэлээхтэр — тарбыйах, 5-тии куул хортуоппуй, Бэтэринээрийэ сэртипикээтэ, 10 тыһ. солк. уу харчынан наҕарааданы туттулар. Ыраахтан кэлбит сылгыһыкка Протопопов А.С. (Үҥкүр) анал бириис бэрилиннэ, бастакы холонор эдэр, саҥа сүүрдээччи сылгы хаһаайыныгар Игорь Платоновка бириис ананна. “Сөбүлүүр дьарыгар бэриниилээх” диэн анал бириис норуот маастара Л.С.Ларионова кыл бэргэһэтэ Кыыллаах уолугар И.С.Корниловка туттарылынна.

Көрөөччү тарҕаспытын да кэнниттэн хомунан, уһун айаҥҥа турунуохтарыгар диэри ат сүүрдүбүт дьоммутун  минньигэс аһынан, ис миининэн күндүлээн тото аһатан атаартаабыт олохтоох балыыһа кэлэктиибигэр (кыл. быраас Светлана Георгиевна) тэрийээччилэртэн махтал тыл этилиннэ, бириис бэрилиннэ.

Ат сүүрдүүтүн быыһыгар көрөөччүлэр көһүйбүт былчыҥнарын хамсатан, 100 м. атаҕынан сүүрүү тэриллибитэ. Манна Вадим Чердонов куоталаһааччыларын ырааҕынан быраҕан, 5 тыһ. солк. “Көмүс кумах сүүрүүлэрин” бирииһин ылла.

Саха омугар Дьөһөгөй оонньуута былыр-былыргыттан кэрэхсэнэ, дуоһуйа, астына көрөр оонньуулартан биирдэстэринэн буолар. Онон бу сылга аппыт сүүрүүтүн сэҥээрэн араас нэһилиэктэртэн тиийэ  элбэх көрөөччү мустубута сөхтөрдө, асчыттарбыт ас астаан хаһааҥҥытааҕар да хомуллан турунан кэлбиттэрэ астыннарда. Аспыт көрүҥүн арааһа, күммүт тыгарын сылааһа, дьон тэрээһинтэн астыммыта — барыта анаммыт бириэмэтигэр буолан ааспытын туоһулаата. Дьон маннык тэрээһиннэри сэргиирэ көһүннэ.

Тэрийээччилэр ааттарыттан махтал тылларын тириэрдэбит — сыралаах үлэлээх сыспай сиэллээх доҕордоох сылгыһыт уолаттарбытыгар, аппыт сүүрүүтүн үөрүүлээх аһыллыытыгар кыттыбыт “Иэйии” ансаамбыл далбар хотуттарыгар, алгыс сиэрин-туомун толорбут Полина Петровна Торговкинаҕа, “Айылгы”, “Күбэйэ” ансаамбыл кыргыттарыгар, комментатор Мичил Артамоновичка, Виссарион Васильевичка, Василий Васильевич Алексеевка.

“Көмүс кумах сүүрүүлэрэ” күрэспитин өйөөбүт, бириис туруорбут олохтоох дьаһалтабыт (баһылык А.Г.Макаров), көмөнү оҥорбут улуус дьаһалтата (баһылык Н.Н.Харбин) биэс көрүҥ сүүрүүгэ 20-лии тыһ. сэртипикээт, култуура управлениета (нач. А.В.Кубряк)  6 кэмпилиэк мэтээл уонна 2  кубок, тыа хаһаайыстыбатын управлениета (нач. А.П.Антонов) 10 куул эбиэс, бэтэринээрийэ управлениета (сал. А.Ю.Чибыев) сылы быһа босхо көрдөрүнүүгэ 2 сэртипикээт, ИП Ф.А.Романов 10 куул сиэмэ хортуоска, Кыыллаах оскуолатын кэлэктиибэ көстүүм, “Кыталык” уһуйаан кэлэктиибэ миксер набора, В.В. Торговкин, Г.В.Корнилов, Ч.И.Алексеева бааһынай хаһаайыстыбалара биирдии тарбыйах, И.В.Ощепков бааһынай хаһаайыстыбата 5 урулуон сенаж, ИП Д.А. Бастыров, “Сайдам” маҕаһыын (Н.А.Владимирова), “Надежда” маҕаһыын (П.А.Корнилов), Л.С.Ларионова, Н.В.Максимов, Г.Е.Грязнухин анал ааттарга бириистэри, “Кыыллаах уолаттара” түмсүү уу харчынан бириис туруордулар.

Саханы саха дэппит дьөһөгөй оҕотун оонньуулара  үрдүк таһымнаахтык ааста диэн этэллэриттэн астынныбыт, долгуйдубут. Бары бииргэ түмүстэхпитинэ күүстээхпит, үлэбит таһаарыылаах!

Лена ДАНИЛОВА, Кыыллаах нэһилиэгин «Алгыс» сынньалаҥ киинин дириэктэрэ. 

Видео: Дария Александрова, Нарияна Егомина.