“Көмүс саас мичээрэ” — аҕам саастаах дьоҥҥо аналлаах лааҕыр

Уһун үйэлэнии кистэлэҥэ — хамсаныыга, дьарыктаах буолууга, тулалыыр эйгэҕин кэрэнэн толорууга сытар. Ол иһин, Сунтаарга  «Көмүс саас мичээрэ» диэн аҕам саастаах  дьоҥҥо аналлаах лааҕыр үлэлээтэ. Лааҕыры С.А.Зверев-Кыыл Уолун аатынан улуустааҕы норуот айымньытын киинэ тэрийдэ.

Аҕам саастаах дьон дьиэлэригэр хаайтаран олорбокко эрэ элбэх дьону кытта алтыһан,  кэпсэтэн, үөрэн-көтөн санаалара көнньүөрэн үөрүү эрэ аргыстаах бириэмэлэрин туһалаахтык атаардылар.

Лааҕырга 27 кырдьаҕас сырытта.  Күннэтэ киин үлэһиттэрэ бэйэлэрин сатабылларын, дьоҕурдарын аҕам саастаах, ол эрэн аҕыйах хонукка «лааҕыр оҕолоро» буолбут саҥа доҕотторун кытта билиилэрин үллэһиннилэр. «Лааҕыр оҕолоро” күннэрин үҥкүү тэтимнээх сарсыардааҥҥы сэрээккэтэн саҕалыыллар, онтон минньигэс астаах сандалыга олорон күннээҕи торумнарын истэллэр, хоһоон ааҕаллар,  сонуннарын үллэстэллэр. Онтон тутуспутунан дьарыктарыгар сүүрэллэр. Өй-толкуй дьоҕурун сайыннарар остуол оонньууларын астынан туран оонньоотулар. Хомус алыптаах тыаһыгар уйдаран эмтэннилэр, кылыһахтарын арыйдылар уо.д.а интэриэһинэй дьарыктарга сырыттылар. Лааҕыр кыттыылаахтарыгар анаан биир күн мобильнай доруобуйа киинэ үлэлээтэ. Гериатр быраас көрдө, сүрэхтэрин тэтимин иһиллэттилэр, хаан анаалыһын туттардылар, давлениеларын кэмнэттилэр. Быраастар лааҕыр кэмигэр кырдьаҕастар үөрүүлэрин гормона үрдээн ыарыыларын умна быһыытыйбыттар диэн бэлиэтээн эттилэр.

Лааҕыр кыттыылаахтарын күҥҥэ иккитэ аһаттылар. Тэрийээччилэр дьиэлэриттэн кырдьаҕас дьоҥҥо күһүҥҥү булт аһын аҕалан күндүлээтилэр. Ол иһин, лааҕырга истиҥ-иһирэх ыраас эйгэ, сыһыан олохтонно. Түмүктүүр күннэрин ааспыт кэм-ретро күҥҥэ анаатылар. Бу күн “городки” оонньууга күрэстэстилэр, ону таһынан, урукку кэм таҥастарын симэнэн  муода көрдөрдүлэр. Кыһыл көбүөрүнэн киинэ артыыскаларын курдук хаамтылар.

Аҕам саастаах дьон саҥаны, сонуну билэр баҕалара  улаханын, олоххо тардыһыылара улаханын «Көмүс саас мичээрэ» лааҕыр көрдөрдө.

Мира Афанасьева