Дьокуускайга көмүс уорбут күтүөтү туттулар

ИДьМ Дьокуускайдааҕы 2-c №-дээх салаатыгар киин куорат олохтооҕо дьахтартан үҥсүү киирбит. Кини кыбартыыратын иһиттэн көмүс киэргэллэрэ, 20 тыһыынча евро, 30 тыһыынча дуоллар уонна 100 тыһыынча солкуобай сүппүт. Хаһаайка сүтүгүн хойут бэлиэтии көрбүт.

Бэрэбиэркэ кэмигэр кыбартыыраҕа туора киһи киирбитэ көстүбэтэх. Сиэйпэни алдьатыы да суох эбит. ИДьМ холуобунай ирдэбилин үлэһиттэрэ быһаарбыттарынан, уорууга дьиэ кэргэн иһиттэн чугас киһи сыһыаннааҕа биллибит.

Ол курдук, полиция үлэһиттэрэ уорбалаабыттара чахчы буолан тахсыбыт. Уорууга эмсэҕэлээбит дьиэ кэргэн 40 саастаах күтүөттэрэ сыһыаннааҕа биллибит. Күтүөт кэргэнин дьоно куорат таһыгар олороллорунан туһанан, ийэ кыннын аах куораттааҕы кыбартыыраларыгар кэлэ-бара сылдьан кыра-кыралаан харчы, көмүс уора сылдьыбыт. Уорбут көмүстэрин барытын ломбардка туттаран испит.

Биллибитинэн, күтүөттэрэ уорбут харчытынан онлайн-казиноҕа оонньоон сүүйтэрэр эбит. Арассыыйа Федерациятын холуобунай кодексатын 158 ыст. 4 чааһынан «Уоруу» диэн холуобунай дьыала тэриллибитин туһунан ИДьМ пресс-сулууспата иһитиннэрэр.