Көмүсчүттэр кыһалҕаларын быһаарсаары түмүстүлэр

Бүгүн көмүсчүттэр «Золотодобыча в Якутии-2023» уочараттаах сааскы кэмпириэнсийэлэрэ буолан ааста.

Кэмпириэнсийэҕэ көмүс бырамыысыланнаһын кыһалҕаларын уонна ону быһаарыы суоллара диэн сүрүн боппуруостары көрдүлэр. Тэрээһини тэрийээччилэринэн Саха сирин кыһыл көмүһүн бырамыысыланнаһын уонна СӨ Атыы-эргиэн бырамыысыланнай палаатата буолар. Оттон кэмпириэнсийэни Кыһыл көмүс бырамыысыланнаһын сойууһун бэрэссэдээтэлэ Михаил Брук иилээн-саҕалаан ыытта.

«Номнуо онус кэмпириэнсийэ ыытыллар. Сырыы аайы сиртэн хостонор баайы туһаҕа таһаарыыга турар сытыы боппуруостары быһаарсабыт, ол иһигэр көмүһү хостооһуҥҥа. Нолуоктааһын, бырамыысыланнай куттал суох буолуутун, технологиялары сайыннарыы, каадыр боппуруоһун бүгүн дьүүллэстибит. Үгэс курдук, кэмпириэнсийэҕэ банкирдар, аналитик исписэлиистэр кыһыл көмүс ырыынагын инники кэскилин, сыаната тахсыытын-түһүүтүн туһунан кэпсииллэр. Бүгүн, чуолаан, нормативнай бааза туһунан ырытыстыбыт. Элбэх нуорма аактара көтүрүлүннүлэр, ол оннугар саҥалар өссө даҕаны ылылла иликтэр. Сир баайын туһаныы үгүс сокуоннара бүгүҥҥү күҥҥэ түргэн быһаарыныыны ылынары ирдииллэр. Эбийиэктэргэ бырамыысыланнай куттал суох буолуутун эспэртиисэтин боппуруоһа, холобур, билиҥҥи туругунан, оҥорон таһаарыы бары салаатын тохтотон кэбиһэр кутталлаахтар. Сир учаастагын туһаныыга, ылыыга докумуону оҥорууга эмиэ боппуруос элбэх. Сааҥсыйаларынан сибээстээн, дойду иһигэр кыһыл көмүһү эргитии, ырыынагы сайыннарыы, батарыы ыарааһына, кэккэ дьаһаллары ылары ирдиир», — диэн Михаил Брук санаатын эттэ.

Тэрээһиҥҥэ көмүһү хостуур тэрилтэлэр салайааччылара уонна ситэриилээх былаас уорганнарын, Роснедра, Росприроднадзор, нолуок сулууспата, бааннар, научнай-чинчийэр институттар, атын даҕаны тэрилтэлэр бэрэстэбиитэллэрэ кытыннылар.

Кэмпириэнсийэ аһыллыытыгар көмүсчүттэри СӨ Бырабыыталыстыбатын Бэрэссэдээтэлин солбуйааччы Кирилл Бычков эҕэрдэлээтэ. Ил Түмэн сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Сахамин Афанасьев айылҕа харыстабылын итиэннэ бырамыысыланнай тэрилтэлэргэ сыһыаннаах сокуоннар тустарынан тыл эттэ.

Оттон СӨ Бырамыысыланнаска уонна геологияҕа миниистирэ Максим Терещенко өрөспүүбүлкэҕэ көмүс хостооһунун  бүгүҥҥү туругун туһунан иһитиннэрдэ.

Күндү металлары, тааһы хостооһун уонна оҥорон таһаарыы эйгэтигэр үлэлиир тэрилтэлэр судаарыстыба өйөбүлүн тупсарар дьаһаллар тустарынан Арассыыйа старателлэрин сойууһун бэрэссэдээтэлин сүбэһитэ Павел Луняшин кэпсээтэ.

Итини таһынан Росприроднадзор Саха сиринээҕи салалтатын салайааччыта Андрей Жолудев уонна СӨ Экологияҕа, айылҕа харыстабылыгар уонна ойуур хаһаайыстыбатыгар миниистири бастакы солбуйааччы Дьулустан Хон бэйэлэрин хайысхаларынан кэпсээтилэр. «Технологиялар» хампаанньа генеральнай дириэктэрэ Владимир Пятаков сиртэн хостонор туһалаах баайы көрдөөһүҥҥэ аныгылыы технология туһунан презентация оҥордо.

Күн иккис аҥарыгар 2023 сылларга киирбит сир анныттан хостонор баайы туһаныы, көҥүлү ылыы туһунан сокуоннарга, нолуоктааһыҥҥа уларыйыылар-эбиилэр тустарынан кэпсэттилэр.  Ол курдук, «Налоговые консультанты» хампаанньа нолуоктааһыҥҥа саҥа сүүрээннэр, оттон  «Безопасность» хампаанньа бырамыысыланнай куттал суох буолуутун салаатыгар сокуоннар уларыйыыларын туһунан, ону таһынан АТБ баан, Профзолото, Мегафон, о.д.а тэрилтэлэр бэйэлэрин хайысхаларынан кэпсээтилэр.

Көмүсчүттэр кэмпириэнсийэ түмүгүнэн СӨ Бырабыыталыстыбатыгар, Ил Түмэҥҥэ, ол кэнниттэн федеральнай таһымҥа кэккэ боппуруостары быһаарарга докумуон бэлэмнииргэ быһаардылар.