Көмүскэл, харысхал буолар “Мега” хостоннулар

Мукучу нэһилиэгэр Айыыһыт ыйын баттаһа муус устар 19 күнүгэр байыаннай дьайыы кыттыылаахтарыгар уонна кинилэр дьиэ кэргэттэригэр аналлаах уйулҕа, эт-хаан, чөл турук өттүнэн көмөлөһөр «Мега»  хос арылынна.

Бэлиэ күнү алгысчыт, Саха сиринээҕи норуот эмчиттэрин конфедерациятын бэрэссэдээтэлэ Вероника Николаевна Семенова — Хомусчаана бэйэтинэн кэлэн алгыһын анаата. Кэлбит дьон куттуун-сүрдүүн налыйан алгыһы эттэригэр-хааннарыгар иҥэрэн эгди буоллулар, көмүскэллээх, харысхаллаах сананнылар. Ыраах сылдьар оҕолорбут, уолаттарбыт этэҥҥэ эргиллэн кэлэллэригэр сүрүн санааны бары бүттүүн туһаайдылар. Бу курдук биир сомоҕо күүс буолан, дохсун ытыс тыаһын доҕуһуолунан аалан кыһыл лиэнтэни быһан, тустаах көмө оҥоһуллар хоһун күлүүһүн «Мукучу нэһилиэгэ» тыа сэлиэнньэтин баһылыга Николай Иванович Левин үрүҥ халааттаах аанньалга, сүүрбэ бэһис сылын доруобуйа харыстабылын эйгэтигэр биэлсэринэн үлэлии сылдьар, Саха Өрөспүүбүлүкэтин Доруобуйа харыстабылын туйгуна, норуот эмчитэ — Николай Николаевич Прокопьевка туттарда . Бар дьоҥҥо туһалыахтаах хос ананан оҥоһуллубут дьаралыгын Вероника Николаевна олус долгуйан туран ыйаата. Бу биһиги нэһилиэккэ Кэбээйибит улууһугар биир бастакынан арылынна. Ол курдук Өрөспүүбүлүкэҕэ бэсиһинэн «Мега» хос үлэһит, үлэлиир миэстэ бириэмэтигэр таба тайанан көстө охсон бэрт түргэнник үлэҕэ киирдэ.

Бар дьоммутугар бигэ тирэх буолар, сырдык санааны саҕар, туругу тупсарар, эти-хааны чэбдигирдэр, уйулҕаны сааһылыыр сахалыы эйгэлээх көмө хоһо тигинэччи үлэлииригэр,  тустаах дьоҥҥо күүс-көмө буоларыгар Хомусчаана уонна кэлбит да дьон бигэ эрэллээхтэрин биллэрдилэр.

Соһуччу долгутуулаах түгэнинэн бэйэбит уолбут Иван Иванович Абрамовка Норуот эмчитэ буоларын туоһулуур докумуону туттарыы буолла. Онон нэһилиэкпитигэр бар дьоннорун көмүскүүр, эмтиир-томтуур, арчылыыр, араҥаччылыыр туспа суоллаах-иистээх дьоммут арыллан, тахсан иһэллэриттэн сэмээр астынабыт уонна айылҕабытыгар, өбүгэлэрбитигэр махтанабыт. Тустаах тэрилтэлэр бу саҥа арыллыбыт хоско анаан бэлэхтэри, үлэ чэрчитинэн туттуллар тэриллэри туттардылар, эҕэрдэлэрин эттилэр. Харда махтал суруктарын кытта өйдөбүнньүк бэлэхтэрин олохтоох дьаһалта аатыттан Вероника Николаевнаҕа, Николай Николаевичка, Айталина Григорьевнаҕа — Николай Иванович туттарда.

Бу бэлиэ күҥҥэ эмтээһин ньымаларыгар, саҥа аппараттарга маастар кылаастары ыыттылар, ким көрдөрүөн, эмтэниэн баҕалаах миэстэтигэр туһанна. Чахчы даҕаны бар дьонугар чэгиэн туругу түстүүр Николай Николаевичка, кини дьиэ кэргэнин аламай маҥан күн көмүс утахтарынан бигээн, күн өркөн күүһүнэн көмүскээн Үөһээ Үрдүк Айыыларбыт арчылаатыннар, араҥаччылаатыннар диэн баҕарабыт!

Күндү дьоммут, айылҕаны кытта ситими быспакка итэҕэлбитин тарҕатан, күүспүт-кыахпыт тиийэринэн ыччаттарбытыгар ыллыктаах санаабытын саҕан түмсүөҕүҥ! Ыраах баар эр хоһуун уолаттарбыт, анал дьайыы бары кыттыылаахтара этэҥҥэ дойдуларыгар эргиллэн кэлэллэрин баҕаран сырдык күүһү, санааны ыытан кыайыыны чугаһатыаҕыҥ! Бигэ тирэх буолар анабыл хос бар дьоҥҥо туһата үксээтин! Өйөбүл, күүс- көмө буолар, сүбэ-ама биэрэр дьоммутугар үлэ чааһын билсэн суруттарыҥ, доруобуйаҕытын тупсарыҥ, тустаах көмөнү туһаныҥ диэн баҕара хаалабыт.

Вера Прокопьева, Мукучу, Кэбээйи.