«Кэнчээрилэр» лааҕырдара — оҕолор сөбүлүүр лааҕырдара (ВИДЕО)

Уус Алдаҥҥа  РФ үтүөлээх уонна образцовай кэлэктиибэ, Саха хомсомуолун бириэмийэтин лауреата «Кэнчээри» оҕо ырыа-үҥкүү норуодунай ансаамбылын лааҕырыгар сыл ахсын элбэх оҕо сылдьар. Быйыл 43-c сылын  таһаарыылаахтык үлэлиир лааҕырга 32 оҕо кэлэн дьарыктанар, сынньанар, билиитин-көрүүтүн хаҥатар.

Лааҕыр начаалынньыгынан Ширяева Надежда Гаврильевна, иитээччинэн Яковлева Лена Игоревна, психологынан Ушницкая Олеся Юрьевна үлэлииллэр. Самаан сайын уйгулаах ыһыаҕар анаан манна сылдьар оҕолору Парников Василий Степанович, Ноговицына Ульяна Петровна дьарыктыыллар.

Күн 9.30 ч. сэрээккэттэн саҕаланар. Сарсыардааҥҥы аһылык кэнниттэн билиини-көрүүнү кэҥэтэргэ викторина арааһа ыытыллар. Ону сэргэ, куонкурустар, оонньуулар оҕолору түмэллэр. Эбиэт кэнниттэн таһырдьа оонньотобут. Сүүрүү-көтүү, күрэхтэһии, сибиэһэй салгын бу барыта олус туһалаах. Онтон салгыы ыһыахха көрдөрөр нүөмэрдэрин бэлэмнииллэр, дьарыктаналлар. Киэһээ биэс аҥаарга диэри бириэмэ биллибэккэ хаалар. Оҕолор дьиэлэригэр тарҕаһаллар. Сарсыныгар эмиэ үөрэ-көтө, тиэтэйэ-саарайа тиийэн кэлэллэр.

Быйыл лааҕырбыт оҕолоро нэhилиэктэр ыһыахтарын сиэригэр-туомугар, култуурунай тэрээhиннэригэр кыттан киэргэттилэр. Ол курдук, Дүпсүҥҥэ биллиилээх олоҥхоһут Арамаан Өлөксөйөп — Бөҕө Арамаана төрөөбүтэ 125 сылыгар аналлаах Олоҥхо ыһыаҕын чэрчитинэн, II Лөгөйгө, Тулунаҕа, I Хороҕо, Чараҥҥа Улуу Кыайыы 80 сылларыгар аналлаах «Өрөгөй кынаттаах кыайыы ыhыахтарыгар» кытыннылар. Аны билигин, Туймаада хочотун ыhыаҕар биир дойдулаахтарбытын эҕэрдэлии бараары бэлэмнэнэбит. Онтон салгыы ытык Таатта улууһугар «Манчаары оонньууларыгар» аhыллыытыгар, култуурунай бырагырааматыгар кыттыыны ылыахтаахпыт. Дьэ, ити курдук түбүгүрэн күөх сайыммытын атаарыахпыт. Табылыннаҕына, атырдьах ыйыгар Бишкеккэ «Луч Надежды» лааҕырга сынньана барыахпыт.

Ульяна Ноговицына

Хаартыскалар, видео: ааптар тиксэриилэрэ