Кэнчээрилэр «Азия оҕолоро» оонньууларын өрөгөй ырыатын толоруохтара

“Кэнчээри” оҕо норуодунай ансаамбыла Кемеровскай уобаласка ыытыллар «Азия оҕолоро» кыһыҥҥы  спортивнай иккис оонньуулар арыллыытыгар тиийэн, өрөгөй ырыатын толоруоҕа. Бу туһунан ансаамбыл салайааччыта Василий Степанович Парников иһитиннэрдэ:

— Бу күннэргэ үөрүүлээх сонуну тутан соһуйдубут, үөрдүбүт. Кемеровоттан «Азия оҕолоро» кыһыҥҥы спортивнай иккис оонньуулар тэрийээччилэрэ өрөгөй ырыатын арыллыыга кэлэн толоруҥ диэн ыҥырдылар. Онон, сарсын, олунньу 23 күнүгэр, Кузбааска көтөөрү бэлэмнэнэ сылдьабыт.

Мин санаабар, тэрийээччилэр биһиги бастакы бэрэсидьиэммит Михаил Ефимович Николаев оонньуулары олохтообутун сыаналаан, суолталаан, биһигини ыҥырдылар. Бу ылланыахтаах өрөгөй ырыатын сүүрбэччэ сыллааҕыта айбыппыт. 1978 сыллаахха Уус Алдаҥҥа «Тойон Мүрү» диэн мелодистар түмсүүлэрин тэрийбитим. Ол кыттыылаахтара Станислав Луковцев уонна Галина Иванова толкуйдаабыттара, ону мин чочуйан оҥорбутум. Онтон саҕалаан «Кэнчээри» ансаамбылга дьарыктанар оҕолорго хорга ыллатар буолбуппут. 2000 сыллаахха буолбут «Азия оҕолорун» иннинэ өрөспүүбүлүкэ бырабыыталыстыбата куонкурус ыыппытыгар, 18 үлэ киирбититтэн бастаабыппыт. Маннык түөртэ күрэхтэһэн кыайан, оонньуулар өрөгөйүн ырыата буолары ситиспиппит. Онон ырыа сахалыы, нууччалыы, английскайдыы тылларынан сүүрбэ сылы быһа ылланна.

2019 сыллаахха оччотооҕу СӨ Бырабыыталыстыбатын бэрэссэдээтэлэ Владимир Солодов Бороҕоҥҥо отчуотунан кэлэ сылдьыбытыгар, Сахалиҥҥа ыытыллар бастакы оонньууларга өрөгөй ырыатын ыллыахха диэн туруорсубутум. Онуоха Владимир Викторович дьаһал биэрэн, бу «Азия оҕолорун» иккис күнүгэр ырыаны тыаһаппыттара.

Онон оонньуулар өрөгөй ырыаларын толоро диэн атын эрэгийиэҥҥэ бастакыбытын барабыт. Быйылгы оонньуулар тэрийээччилэрэ суолта ууран, убаастаан, ансаамбылбытын ыҥырдылар, айаммытын уйуннулар. Тоҕус оҕо уонна бэйэм буолан, оонньуулар арыллыыларыгар кытта бараары үөрэ сылдьабыт.