Кэҥкэмэҕэ — айылҕалыын, чөл туруктуун алтыһа

От ыйын  6 күнүгэр   Анаабыр оройуонугар  райкомолга сэкирэтээринэн  үлэлээбит Д.Г.Павлов кэргэнэ,  учуутал  идэлээх Н.К.Павлова   Дьокуускайтан  46 килэмиэтиргэ, Кэнкэмэҕэ баар  даачаларыгар эбиэттээн баран, 43-с килэмиэтиргэ  сытар Мария Спиридоновна Платонова  үүтээнигэр  бионергетик, космофизик Николай Иннокентьевич  Слепцов-Сылык   уонна диетолог-быраас, нутрициолог, мэдиссиинэ наукатын хандьытаата Анастасия Дмитриевна Саввина “Чөл олох” лиэксийэлэрин истэ бараары биир чаас айаннаатыбыт.

Кэнкэмэҕэ уот суох, сибээс да суох. Бу килиэмэтирдэр икки ардылара да тус-туспа дьиктилээхтэр. Павловтар олорор тыалара харыйалар, аарыма тииттэр сис тыаҕа  үүммүт буоллахтарына, Марина Платонова олорор даачатын тыатын маһа барыта бэс чагда. Кыталыктар түһэн ааһар “Айыы тайбыт күөлэ” диэн ааттаах күөлгэ собо балыктаах, сөтүөлүүргэ кумахтаах,  сыыра олус туруору эбит. Марина Спиридоновна  туттубут саха балаҕаныгар бионергетик Николай Слепцов-Сылык дакылаатын истэ олорон, хайдах курдук саха дьоно мындырдарын, тулуурдаахтарын, дьоҥҥо көмөлөһөллөрүн сөҕө санаатым. Николай Иннокентьевич   Чурапчы Сылаҥыттан төрүттээх. Ийэтэ М.С Новгородова, аҕата И.Ф Слепцов — Аҕа дойду сэриитин бэтэрээнэ. Николай Иннокентьевич оҕолордоох, сиэннэрдээх, бииргэ төрөөбүттэр алтыалар. Кини Томскайдааҕы университет физика факультетын бүтэрэн,  космофизическай чинчийиилэр уонна аэрономия институтугар сүүрбэччэ сыл научнай үлэһитинэн сылдьыбыта.

Ирбэт тоҥҥо дириҥ дьаамалар хаһылланнар сир алдьаннаҕына-кээһэннэҕинэ,  уу олохсуйдаҕына “локальнай аномальнай зоналар” үөскүүллэр эбит. Ити зоналар тыынар тыыннаах бионергиятын сиэн, буомурууну үөскэтэн, тыа сиригэр, үгүс ыал дьиэтин анныгар тоҥ ирэн, муосталара оһохторо иҥнэри-таҥнары түһэн,  оҥкучахтарга уу киирэн, дьиэ тимирбит буолар. Оҥкучахтар  тастарыгар утуйар ороннор тураллар, ол иһин, дьон бионергиятын  мөлтөөһүнүн төрүөтэ манна сытар эбит. Ити хаһыллыбыт аһаҕас сир өбүгэлэр этэллэринэн, “аномальнай зона” —  абааһылар киирэр-тахсар сирдэрэ. Николай Иннокентьевич  итинник көстүүлэртэн, киһи уйулҕата көттөҕүнэ кутун-сүрүн ыраастаан, кинилэр араас ыарыыга ылларалларын, итэҕэс оҕолор төрүүллэрин, бэйэҕэ тиийиниини сэрэтэр-бохсор сэдэх идэлээх. Биополе мөлтөөтөҕүнэ, көмүскэнэр дьоҕур мөлтөөн, ону оҥотторон көннөттөрөн биэриэххэ сөп эбит.

Николай Иннокентьевич  “Чараас эйгэ” (энергоинформационнай эйгэ) диэни эмиэ быһааран биэрдэ.Элбэх көрбүөччүлэри, норуот эмчиттэрин кытта билсэн, кини научнай-филолософскай үлэтигэр көмөлөспүттэрин махтанан кэпсиир. Саха норуота былыр-былыргыттан норуот эмчиттэригэр эмтэнэн кэллэҕэ, экстрасенстар, отоһуттар, удаҕаттар, көрбүөччүлэр араас ньыманан эмтээн көмөлөһөн, дьону-сэргэни абырыыллар, оттон  ойууттар диэн аҕыйахтар эбит. Николай Иннокентьевич   сэттис кинигэтин, “Чараас эйгэ кистэлэҥэ” диэн олус интириэһинэй кинигэни таһаартарбыт. Ити курдук, кэрэхсэбиллээх лиэксийэни истэн баран,  туристар элбэх боппуруоһу ыйыттылар.

Сынньалаҥ кэмигэр  Власий Вырдылин-Саҥарар былаас хоһоон  ааҕан сэргэхситтэ.       Диетолог-быраас Анастасия  Дмитриевна олус  интэриэһинэй лиэксийэтигэр  былыр  өбүгэлэрбит аһаабыт астарын, билигин аһыыр аспытыгар тэҥнээн, сөптөөхтүк аһыыр  доруобуйаҕа туһалааҕын, чөл олох уһун үйэлэнии төрүөтэ буоларын киэҥник сырдатта. Ону тэҥинэн эмтээх оттор туһаларын, күөх гречкэнэн тумалаан килиэп оҥосторун, сыа туһатын, ханнык астарга, фрукталарга битэмиин элбэҕин кэпсээтэ. Үүт астартан кымыс, быыппах бырыһыаннарын, хаачыстыбаларын, эпэрээссийэлэммит дьон диеталарын уонна  ыйааһыны түһэрии, хас да хонукка аһаабакка аччык сылдьыы сэрэхтээҕин быһааран биэрдэ. Анастасия Дмитриевна дакылаатын истээри, киниттэн сүбэ ылаары куртахтарын, үөстэн таас ылларан эпэрээссийэлэммит ыалдьыттар элбэх боппуруоһу биэрэн, сүбэ ылан астынан тарҕастылар.

Ити курдук, айылҕалыын алтыһан, сэргэх лиэксийэттэн элбэх саҥаны билэн,  Анастасия Дмитриевнаҕа, Николай Иннокентьевич-Сылыкка, Мария Спиридоновнаҕа, Д.Г.Павловка, Т.В.Аммосоваҕа, суоппар А.П Федоровка истиҥ махталбын тиэрдэбин. Чугас дьоҥҥутун, бэйэҕитин дьол, үөрүү арыаллаатын диэн баҕа санаабын тириэрдэбин.

                                  Галина БОРИСОВА-ТОЛБООНО,  РФ суруналыыстарын, СӨ Суруйааччыларын сойуустарын чилиэнэ