Кэнсиэртэн киирбит үбү байыастарга ыытыахтара

Өксөкүлээх Өлөксөй аатынан Норуоттар доҕордоһууларын дьиэтигэр анал байыаннай дьайыы кыттыылаахтарын өйүүр «Саха сирин уонна Москва музыканнара — Арассыыйа аармыйатыгар» диэн кэнсиэртэр буоллулар. Киирбит үбүнэн анал тэриллэри, маллары ылан, Саха сирин байыастарыгар ыытыахтара.

Бырайыак ааптара – Өлүөхүмэ улууһун Дабаан сэлиэнньэтиттэн төрүттээх, Арассыыйа продюсера Федор Анучин. Кини былырыын балаҕан ыйыгар Донецкайга бара сырыттаҕына, маннык кэнсиэртэри оҥорор туһунан идиэйэ кэлбит. Бастакы аһымал кэнсиэри Москваҕа оҥорбуттара.

Норуот дьокутаата Валерий Лютай эппитинэн, бүтүн дойду олохтоохторо бииргэ түмсэн, байыастарга көмөлөһөллөр, онон кыайыыга кылааттарын киллэрэллэр.

Кэнсиэргэ Стас Лешкевич бөлөҕө, “Голос” шоу кыттааччылара Валерия Миронова уонна Сергей Архипов, «Туймаада», вокальнай ансаамбыл, норуодунай артыыстар Екатерина, Алексей Егоровтар, кинилэр уолаттара Алексей Егоров-Өркөн уонна Андрей Егоров-Харысхан кытыннылар.

Кэнсиэртэри Москваҕа Саха сирин бастайааннай бэрэстэбиитэлистибэтэ, СӨ тас сибээскэ, норуоттар дьыалаларыгар уонна култуураҕа, духуобунай сайдыыга министиэристибэлэрэ өйөөтүлэр.

Ил Дархан, бырабыыталыстыба дьаһалтатын пресс-сулууспата.