Кэнсиэртэн киирбит үп кыайыыны уһансар

Ааспыт өрөбүллэргэ күһүҥҥү сылаас күнү-дьылы баттаһан, Чагда сэлиэнньэтин айар ыччата ыаллыы сытар Кэбээйи нэһилиэгэр гостуруоллаан кэллэ. Аһымал кэнсиэртэн киирбит үп Кэбээйи улууһун ассамблеятын счетугар ыытыллан, кыайыыны уһансарга төһүү буолла.

“Бүгүн дьоро киэһэ Кэбээйи бөһүөлэгэр ыаллыы сытар Чагда бөһүөлэгин талааннаах эдэр ыччата кэлэн, ыллаан-туойан астыннаран барда. Истибэтэхпитин истэн, көрбөтөхпүтүн көрөн, наһаа дуоһуйдубут. Бииртэн биир чаҕылхай ырыаһыт тахсан, хайа да идэлээх артыыстааҕар итэҕэһэ суох ыллаатылар-туойдулар, имигэс үҥкүүһүттэр нүөмэрдэрэ өссө киэргэтэн биэрдэ. Кэнсиэргэ кыттыбыт Чагда талааннаах ыччатыгар, дьонноругар, баһылык Айыл Седельников барҕа махталбытын тиэрдэбит, куруук маннык ырыа-тойук аргыстаах, үөрэ көтө сылдьыҥ!”

“Дьэ маннык Кэбээйи нэһилиэгин олохтоохторо махтал тылларын эппиттэрэ биһиги санаабытын өрө көтөҕөр”, — диэн санаатын үллэстэр култуура сайдыытын киинин уус-уран салайааччыта Альбина Ноговицына.