Кэнтик, Кырыкый, Өргүөт уонна Быракаан, Далыр — Мэйик — Оҥхой нэһилиэктэрин кыраныыссатыгар ойуур баһаардара бэлиэтэннилэр

Бэс ыйын 29 күнүттэн Үөһээ Бүлүү улууһугар ойуур баһаардарынан сибээстээн суһал быһыы биллэриллибитэ.

Күннэтэ ойуур баһаарын утары охсуһууга олохтоох нэһилиэнньэ дьоно, ойуур харысхалын үлэһиттэрэ, техникалар үлэлииллэр. Билиҥҥи туругунан, Кэнтик, Кырыкый нэһилиэктэригэр, Өргүөт уонна Быракаан кыраныыссатыгар, Далыр — Мэйик — Оҥхой нэһилиэктэрин кыраныыссатыгар ойуур баһаардара бэлиэтэннилэр.

-Быракаан нэһилиэгиттэн 12 км тэйиччи сиргэ от ыйын 8 күнүгэр ойуур баһаара бэлиэтэммитэ. Ойуур баһаарын умуруорууга 44 киһи, 3 техника үлэлиир. Ойуур баһаарын төрүөтэ — чаҕылхан. Кэнтик нэһилиэгиттэн 5 км тэйиччи сиргэ ойуур баһаара от ыйын 8 күнүгэр бэлиэтэммитэ. Ойуур баһаарын умуруорууга 81 киһи, 3 трактор, 3 УАЗ үлэлиир. Баһаар төрүөтэ  — чаҕылхан. От ыйын 9 күнүгэр күнүс 13:00 чааска Оҥхой нэһилиэгин Хомустаах сиригэр, Далыр уонна Мэйик кыраныыссатыгар ойуур баһаара бэлиэтэммитэ. Баһаары умуруорууга  51 киһи, 8 техника үлэлиир. Баһаар төрүөтэ  — биллэ илик. Эрдэ биир күн иһигэр этиҥнээх чаҕылхан кэннэ 6 нэһилиэккэ ойуур баһаара тахсыбытын, тутатына умуруоран, уоту тохтотуллубута. Билигин тыал күүһүрэн, кураан туран ойуур баһаара саҥа күүстэннэ. Ойуур харыстабылын үлэһиттэрэ, олохтоох дьаһалта, олохтоох дьон күн-түүн ойуур баһаарын утары үлэни ыыталлар. Бүгүҥҥү туругунан өссө эбии икки термоточка булулунна: Дүллүкү уонна Хоро нэһилиэктэрин территорияларыгар. Дүллүкү нэһилиэгиттэн булуллубут ойуур баһаарын көрө дьоннор таҕыстылар. Убаастабыллаах Үөһээ Бүлүү улууһун олохтоохторо! Ойуурга, тыаҕа таҕыстаххытына уоту туттарга сэрэхтээх буоларгытыгар ыҥырабыт! Биир сыыһа туттуу ойуурдарбытыгар улахан хоромньуну оҥорорун умнумаҥ! — диэн улуус баһылыга Валерий Николаев иһитиннэрдэ.