Кэнтик олохтоохторо Бырабыыталыстыба отчуотугар сытыы боппуруостары көтөхтүлэр

СӨ Бырабыыталыстыбатын бастакы отчуоттуур бөлөҕө бэҕэһээ Үөһээ Бүлүү улууһун  Кэнтик нэһилиэгэр үлэлээтэ.

Үөрүүлээх быһыыга-майгыга Кэнтик нэһилиэгэ 2025 сыл түмүгүнэн «Сыл бастыҥ нэһилиэгэ» номинацияҕа кыайыылаах буолбутунан 500 тыһ. солкуобайдаах туоһу суругу нэһилиэк баһылыгар Сергей Петрович Федотовка туттарыллыбытын туһунан улуус баһылыга Валерий Николаев иһитиннэрдэ.

— Мунньахха Үөһээ Бүлүү улууһун Сэбиэтин депутата Василий Иванович Алексеев саха тылын уонна төрүт култуура уруоктара аҕыйаабыттарын, оҕолорго үөрэтиигэ туох үлэ барарын ыйытта. Кини эбии үөрэхтээһин быһыытынан тырахтарыыс, суоппар идэтин оскуолаҕа баһылыыр курдук үөрэтии киириэн сөп дуо диэн этии киллэрдэ. СӨ үөрэҕин миниистирэ Нюргуна Соколова «Мин бастакы идэм» бырайыак баарын, Кэнтик оскуолата биир бастакынан бу бырагырааммаҕа үлэлэһэрин уонна оҕо оскуоланы бүтэрэригэр аттестааттаах эрэ буолбакка, идэлээх бүтэрэрэ олус туһалааҕын бэлиэтээтэ. Ил Дархан Айсен Николаев көҕүлээһининэн саха тылын харыстааһыҥҥа анал бырайыактар үлэлииллэрин Нюргуна Афанасьевна эттэ. Төрүт тылы үөрэтии оскуолаҕа урок эрэ быһыытынан буолбакка, сайыҥҥы сынньалаҥ лааҕырдарга уонна куруһуоктарга эмиэ эбии дьарык быһыытынан киириэхтээхтэрин иһитиннэрдэ. Билигин төрүт тылы оскуолаларга үөрэтиигэ учебниктары саҥардыыга үлэ бара турарын биллэрдэ.

Кэнтик оскуолатын директора Владислав Николаевич Семенов оскуола хапытаалынай өрөмүөҥҥэ наадыйарын этиннэ. 2010 сыллаахха тутуллан үлэҕэ киирбит оскуола хоруобуйата эргэрэн сарайа тэстэр буолбут, материальнай-техническэй баазата эргэрэн саҥардыллыан наада буолбут. Миниистир Нюргуна Соколова хапытаалынай өрөмүөн «Биир ньыгыл Арассыыйа» федеральнай бырагырааматынан ыытылларын уонна сайаапканы, сметаны, докумуону бэлэмнээһин оскуола салалтатыттан тутулуктааҕын эттэ. Кэнтик оскуолатын туругун миниистир бэйэтэ кэлэн көрдө, үлэтин билистэ.

Маны таһынан, кэлэр 2 сылга өрөспүүбүлүкэ бары оскуолаларыгар Wi-Fi уонна видеокамералар туруоруллуохтара, учууталлар үлэлэрин чэпчэтэр планшеттары ылыахтара диэн иһитиннэрдилэр. Миниистиргэ Кэнтик орто оскуолатын нуучча тылыгар учуутала, элбэх оҕолоох ийэ Наталья Федоровна Будищева учуутал аспирантураҕа үөрэнэр кэмигэр өйүүр чопчу механизм уонна усулуобуйа суоҕун ыйда.

Элбэх оҕолоох ыал ийэтэ Лия Альбертовна Павлова босуобуйа ылбат ыал оҕолоро оскуолаҕа харчыга аһыылларыгар кыра да чэпчэтии оҥоһуллубатын этиннэ. Элбэх оҕолоох ыал дастабырыанньатынан Дьокуускай куоракка араас маҕаһыыннарга, түмэлгэ, киинэҕэ сылдьыахха сөп, оттон улууска олорор ыаллар туһанар өҥөлөрө суох диэн бэлиэтээтэ. Бу боппуруос боротокуолга киллэрилиннэ.

Кэнтик олохтоохторо Бырабыыталыстыба отчуотугар сытыы боппуруостары көтөхтүлэр уонна олохторун тупсарарга туһуламмыт элбэх этиилэри киллэрдилэр, — диэн улуус баһылыга Валерий Николаев иһитиннэрдэ.