Кэнтиккэ «Сайыына» оҕо уһуйаана 55 сыллаах үбүлүөйүн бэлиэтээтэ

Үөһээ Бүлүү улууһун Кэнтиктээҕи «Сайыына» оҕо уһуйаана 1969 сыллаахха тэриллибитэ, устуоруйаҕа суруллубутунан бастакы үлэлиир сылыгар 25 оҕо иитиллибитэ.

55 сыл устата «Сайыына» оҕо уһуйааныгар хас да көлүөнэ Кэнтик нэһилиэгин олохтоохторо иитиллэн тахсыбыттара. «Өр сылларга үлэлээбит бэтэрээн уһуйааччыларга сыралаах үлэҕит иһин, оҕолорго тапталгыт, истиҥ сыһыаҥҥыт, ыччаты иитиигэ сүҥкэн кылааккыт иһин махтанабыт», — диэн улуус баһылыга Валерий Николаев ТГ-ханаалыгар иһитиннэрдэ.

«Сайыына» оҕо уһуйаана 2016 сыллаахха федеральнай субсидия көмөтүнэн тутуллубут саҥа икки этээстээх таас дьиэҕэ киирбитэ. Билигин уһуйааҥҥа 84 иитиллээччи 4 бөлөҕүнэн сылдьар. 28 үлэһиттээх.

««Сайыына» оҕо уһуйаанын выпускнига буоларым быһыытынан, 1981 сыллааҕы выпускниктар  уонна тус бэйэм ааппыттан оҕо уһуйаана тэриллибитэ үбүлүөйдээх 55 сылынан итиитик-истиҥник эҕэрдэлиибин. Баҕарабын элбэх иитиллээччини, ситиһиилээх үлэни, уостубат уҕараабат күүһү. Үүнэ-сайда тур тапталлаах уһуйааммыт», — диир Валерий Николаев.