Кэнтиккэ тахсыбыт баһаары умуруораллар

Бэҕэһээ, от ыйын 20 күнүгэр, киэһэ 20:10 ч. Үөһээ Бүлүү улууһун  Харыйалаах сэлиэнньэтиттэн 19,5 км ыраах сиргэ уот турбута бэлиэтэммитэ. Уот турбут сибикитэ биллээтин кытта, тутатына Үөһээ Бүлүүтээҕи «Авиалесоохрана» авиаотделениетын 12 үлэһитэ тиийбит.

— Ойуур баһаарын түргэнник бохсууга уонна умуруорууга эбии 24 киһилээх десантник-баһаарынайдар бөлөхтөрө ыытылынна, — диэн СӨ «Авиалесоохрана» тэрилтэ салайааччытын солбуйааччы Константин Масалов иһитиннэрдэ.

— Хомойуох иһин, тиэхиньикэни тириэрдии билиҥҥитэ кыаллыбат. Ойуур баһаара тахсыбыт сирэ үрдүк булгунньахтаах, хайалаах сир. Билигин уоту умуруорууга 36 киһи үлэлиир, күн иккис аҥаарыгар 6 киһи кэрийэ сылдьан кэтээн көрүүгэ ыытыллыаҕа, — диэн Үөһээ Бүлүүтээҕи судаарыстыбаннай экологическай кэтэбил иниспиэксийэтин салайааччыта Александр Архипов этэр. — Сарсыарда 10 чааска ойуур баһаарын иэнэ 5 гектар буолла.

Хаартыска: летчик-кэтээччи Александр Васильев түһэриитэ