Көҥүл тустуу — доҕордоһуу түһүлгэтэ

Дьокуускайга олимпийскай чөмпүйүөн, СССР успуордун үтүөлээх маастара, Арассыыйа үтүөлээх тириэньэрэ Роман Дмитриев сырдык кэриэһигэр норуоттар икки ардыларынааҕы көҥүл тустууга турнир өрө көтөҕүллүүлээхтик буола турар. Күрэхтэһиигэ кэлбит ыалдьыттар санааларын үллэһиннилэр.

Карапет Енгоян, олимпийскай чөмпүйүөн, аан дойду уонна Европа чөмпүйүөнэ, ССРС алта төгүллээх чөмпүйүөнүн Роман Дмитриев сырдык кэриэһигэр көҥүл тустууга норуоттар икки ардыларынааҕы күрэхтэһиигэ Арменияттан кэлбит тириэньэр:
— Биһиги дойдубутуттан 6 күрэхтэһээччи уонна икки тириэньэр буолан кэллибит. Олус үрдүк тэрээһиннээх күрэхтэһиигэ кэлбиппититтэн астынабыт. Үчүгэй тэрээһин чулуу тустууктар тахсалларыгар көмөлөһүөҕэ. «Триумф» успуорт уораҕайыгар түстүбүт, барыта этэҥҥэ.

Николай Мавроди, Молдавия:
— Мин Гагаузия Комрат куоратыттан сылдьабын. Дмитрий Коркин уонна Роман Дмитриев ааттарыгар сүгүрүйэбин. Билигин көҥүл тустууга тириэньэрбин. Дойдубар успуорт лиссиэйигэр үлэлиибин. Өссө биир холобуру аҕалыахпын баҕарабын. Депутатскайтан Горохов Клим биһиэхэ эрчиллэн турардаах.