Көҥүл тустууга сүүмэрдэммит хамаанда Арассыыйа чөмпүйэнээтигэр бэлэмнэнэр

Ыам ыйын 14 күнүттэн Саха сирин көҥүл тустууга сүүмэрдэммит хамаандата Алдаҥҥа хайыһардыыр-биатлоннуур комплекска дьарыктанар. Тустууктар кэлэр ыйга Дагестан өрөспүүбүлүкэтигэр ыытыллар Арассыыйа чөмпүйэнээтигэр кыттаары бэлэмнэнэллэр. Бу туһунан «Спорт Якутии» саайтка хайыһар успуордугар Олимпийскай резервэ өрөспүүбүлүкэтээҕи спортивнай оскуолатын пресс-сулууспата иһитиннэрэр.

Сүүмэрдэммит хамаандаҕа билигин 32 спортсмен киирэн, дьарыктана сылдьар. Хомууру сүрүн тириэньэр Александр Оконешников салайар. Уолаттар күҥҥэ иккитэ көбүөргэ эрчиллэллэр. Ону таһынан тренажернай саалаҕа уонна чэпчэки атлетика манеһыгар эмиэ сылдьаллар.

Көҥүл тустууга дьахталларга уонна эр дьоҥҥо Арассыыйа чөмпүйэнээтэ Дагестан Каспийскай куоратыгар бэс ыйын 19-25 күннэригэр ыытыллыаҕа.