“Кэпэрэтииппит сайынна”

Бүлүү улууһугар ыытыллыбыт Зоотехник-селекционердар өрөспүүбүлүкэтээҕи куонкурустарын кэмигэр “1-Күүлэт” ПК зоотехниктаабыт, “Гражданскай килбиэн” анал бэлиэ хаһаайына, СӨ Тыа хаһаайыстыбатын бэтэрээнэ Федорова Тамара Васильевнаны көрсүбүтүм. Кини санаатын маннык үллэһиннэ:

— “Күүлэт” сопхуос урут кытыы сытар отделение этэ. 1999 с. “1-Күүлэт” кэпэрэтиип буолбуппут. Быйыл тэриллибиппит үйэ чиэппэрэ буолар. Мин 1983 с. үөрэхпин бүтэриэхпиттэн зоотехниктаабытым. Кэпэрэтиип буолан баран сүөһүнү энчирэппэккэ иитэн, үлэһиттэри хамнастаан кэллилэр.  Тыа хаһаайыстыбатыгар көмө көрүллэр буолуоҕуттан ыла кэпэрэтииппит күүскэ сайынна дии саныыбын.

120 миэстэлээх комплекс тутуллубута. Сопхуос саҕанааҕы хотоннор эргэрэн, ыччат сүөһүгэ анаан хотону хаһаайыстыбаннай ньыманан тутуу ыытыллыбыта. Хамнас үчүгэй буолан, үлэлиир дьон элбэх. Сайылыкпытыгар күүстээх үлэ баран, хас биирдии үлэһиккэ олорор дьиэлээхтэр, уот, уу ситимэ, интэриниэт баар. Онон үлэһиттэр үөрэ-көтө сайылыктарыгар тахсаллар. Үлэлиир усулуобуйа үчүгэй буолан, бородууксуйаны да ылыы үчүгэй дии саныыбын. Арыыбыт сыаҕа сылы эргиччи үлэлиир. Бу Бүлүү улууһун Тыымпы сэлиэнньэтигэр сайылыкка ыытыллыбыт Зоотехник-селекционердар өрөспүүбүлүкэтээҕи үһүс куонкурустарын олус сөбүлээтим. Урукку биир идэлээхтэрбин көрүстүм. Эдэр исписэлиистэри үчүгэйдик үөрэтиэххэ наада. Племенной үлэ исписэлиистэрэ бэйэлэрин тустаах үлэлэринэн дьарыктаныахтаахтар. Биригэдьиир курдук сылдьыа суохтаахтар. Сүөһү боруодатыгар тохтоотоххо, мээнэ боруоданы буккуйар наадата суох. Бэйэбит сүөһүбүтүн иитиэхпитин наада. Холобур, Күүлэккэ оттообут оппутун атын улуус ынаҕа сиэ суоҕа. Зоотехник үлэтиттэн хаһаайыстыба инники туруга олус тутулуктааҕын өйдүөхтээхпит.