Кэпсэтиилэр тустарынан үгэ-хоһоон. Дуона Бас уонна Дуонал

Үгэ-хоһоон. Дуона Бас уонна Дуонал.

Дуона Бас дьылҕата,

Дорҕоонноох тойуга,

Доргуччу ылланар.

Дуона Бас туһуттан

Дуулаҕа кэтиллэр,

Доргуйар туоната

Доруоптаан иһиллэр…

***

Арҕааҥы Алааска

Аан дойду атыырдара

Айгыстан олорон,

Айдааны-араллааны

Аччатар туһугар

Анааран көрбүттэр.

Хагдаҥ эһэ

Хайҕанарын сөбүлүүр

Халлаан көтөрүгэр

Хардарбыт:

“Хайааҥ даҕаны,

Хайаатар да ылбыппын

Хаһан да ыһыктыбаппын,

Хаартыта суох муҥнаах,

Халы-мааргы тыллаах,

Бэҕэһээҥҥи бэтэнээски,

Бэрэсидьиэммит дэнээччи,

Быыбарданарын

Быдан аһараааччы

Боросонуокка —

Күөхтүрэпкэ

Күргүйбүн тириэрт!»…

Кыырай халлааны

Кырыыбалыыр

Көтөр көкөппүт

Хотой Дуоналбыт

Хоҥсуолаахтык

Хоруйдаабыт:

«Хойутаан да буоллар

Хоторгутун хотуоххут,

Хоннохтоох

Холонуубутун

Хоҥнорон көрүөххэ…”

***

Ыгым бэйэлээх

Ылбаҕай тыллары

Ылыннара охсоору,

Ыраата барбакка

Ыттарыгар ыстаммыт…

Ытырыык ыттара

Ырдьыгынаһа түспүттэр,

Ыстырыыстаан барбыттар:

«Киэҥ сирдээх эрээри

Кэрии тыа кыыла,

Күтүр өстөөх

Киэр кэбилийдин!

Күөхтүүрээби

Көмүскүүбүт,

Күөмчүлэппэппит!

Дуона Бас сириттэн

Дуостал тахсыбаттар!

Хагдаҥ эһэ

Харайар харчытын

Хатаан сытыахпыт,

Хаҥаатаҕына,

Хата, хамаҕалыахпыт…”.

Дуоналбыт

Доҕордоһор тойугун

Дуостал умна кэбиспит,

Саарыыр бэйэтэ

Сааҥсыйалары саҥаттан

Саайталыырга санаммыт,

Саалаларын, сүгэлэрин

Ситэ биэриэх буолбут..

***

Хара тыаҕа

Хагдаҥ эһэ

Халтай хаампат,

Харыс да халбарыйбат.

Хара ыттарга

Хат хатылаабыт:

«Дуона Бас сириттэн

Дьүгэлийэ иликтэринэ,

Дуруускалаһар,

Доҕордоһор

Дураак буолбатахпын!».

***

Дуолан майгылаах

Дуонал хотойбут

Саҥа эйэ былааны

Саантыырга санаммыт:

«Саакка-суукка киирбэккэ

Саатар маны ылыныҥ,

Саарыыр санааҕытын

Салгыҥҥа сайҕааҥ дуу!?».

Алдьархайтан ас таһаарынар

Арҕааҥы атамааннар

Айгыстан-айманан,

Анараа былааны

Алдьаппыттара иһиллэр…

***

Дуолан майгылаах

Дуонал хотойбут

«Доҕордуу» буолуоҕун

Дьобуруопа дьонноро —

Дурууска ыттара

Туруорсар аатыран,

Туорайдыы сатыыллар.

Туора мас буолаллар…

Чокуурдаах