Оҕоҕо саба түспүт ыт хаһаайката ыстарааптанна

Ааспыт сыл алтынньытыгар Уус Алдан улууһун Кэптэни нэһилиэгэр хаһаайыннаах ыт оскуола оҕотугар саба түһэн эмсэҕэлэппитэ. Ыт хаһаайката, соҕотох дьахтар бу ыты үс сыллааҕыта уулуссаҕа сылдьарын аһынан иитэ ылбыт диэн KP.RU суруйар. 

Оҕо оскуолаттан төннөн истэҕинэ, баайыылаах турбут ыт сыабын быһан оҕоҕо түспүт.  Ыттан эмсэҕэлээбит оҕону балыыһаҕа киллэрбиттэр. Оттон хаһаайка 1400 солкуобайы ыстараабы нэһилиэк дьаһалтатыгар төлөөбүт, ону сэргэ оҕо эмтэммитин, таксыынан сылдьыбыт ороскуотун уйуммут. Ол эрээри, эмсэҕэлээбит өрүт оҕо уйулҕатыгар ылбыт охсуутун (моральный ущерб) 140 тыһыынчаны көрдөөбүт. Хаһаайыстыбаннай кинигэҕэ сурулларынан, ыт хаһаайката 70 саастаах дьахтар диэн ыйыллыбыт. Онон бу 140 тыһыынча солкуобайы 18 тыһыынча биэнсийэлээх сааһырбыт дьахтар уйунуохтаах диэн суут уураахтаабыт.

Бэйдиэ ыт кыһалҕата куоракка эрэ буолбакка, улуустарга эмиэ сытыытык турар Хаһааҥҥа диэри бэйдиэ уонна хаһаайыннаах ыттартан оҕолор эмсэҕэлииллэрий?