Кэптиннэр былааннарын толоруохтара

Горнай улууһун Кэптин (баһылык Д.Борисов) туруу отчуттара тиэрдиллибит былааннарын толороллоро бу кэллэ. Ол курдук, атырдьах ыйын 29 күнүнээҕи туругунан былааннарын 98,26 быр. толорон иһэллэр. Билигин алта хаһаайыстыба уонна икки тыраахтар ходуһаҕа сылдьар. Ити иһигэр 40-н тахса км тэйиччи сиргэ оттооччулар бааллар. Кэптиннэргэ тиэрдиллибит былаан – 1039 т.

Сааскы өттүгэр суоллара быстар буолан, олохтоохтор оттуур тэриллэрин, сэлээркэлэрин эрдэттэн хааччынар үгэстээхтэр. Онон быйыл даҕаны итинтэн туораабатылар.

“Быйыл от үүнүүтэ үчүгэй. Онон сыл тахсар оппутун булунар, былааммытын толоруохпут диэн эрэнэбит”, — диир нэһилиэк тыа хаһаайыстыбатын исписэлииһэ Прокопий Михайлович Потапов.