«Кэрэ эйгэ умсулҕана» быыстапка

Киһи барахсан бу орто Ийэ сир дойдуга олорорун тухары кэрэни кэрэхсии, үчүгэйгэ үөрэнэн, сырдыкка, ырааска тардыһан, үтүө дьону кытта алтыһан сылдьыан баҕарар.

Үтүө дьону кытта алтыстаххына, күүскэр күүс, санааҕар санаа эбиллэр. Биир оннук кэрэни кэрэхсэтэр, үтүөҕэ үөрэтэр, билиини биэрэр – аҕам саастах дьон оскуолата буолар.

Бүтүн Арассыыйа үрдүнэн ыытыллар «Библионочь 2025» тэрээһиҥҥэ Горнайга П.Д. Аввакумов аатынан киин бибилэтиэкэ иһинэн тэриллибит «50+» аҕам саастах дьон оскуолтыгар тэриллэн үлэлиир «Уруһуй» устуудьуйатыгар дьарыктаннар үһүс көлүөнэ оскуолатын истээччилэрэ бэйэлэрин уруһуйдарын дьон-сэргэ көрүүтүгэр таһаардылар. «Кэрэ эйгэ умсулҕана» быыстапка болҕомтону улаханнык тарта, кэрэхсэбили ылла.

Хартыыналарга айылҕа, сахалыы мал-сал, иһит-хомуос уруһуйдаммыт, дьон мэтириэттэрэ бааллар.

Быыстапканы көрөөрү бу күннэргэ кэрэни кэрэхсиир улууспут олохтоохторо бибилэтиэкэҕэ кэлэллэр.

Мария Павлова

Хаартыскаларга ааптар түһэриитэ