Кэрэ сибэккинэн сэтинньи тымныытын сэргэхситэллэр

Кэбээйи улууһун Сииттэ нэһилиэгэр  хараҕы үөрдэр кэрэчээн дьиэ сибэккилэрин олордор хаһаайкалар элбэхтэр.

Бу күннэргэ социальнай ситимнэргэ олус кэрэ сайыҥҥы дьиэ сибэккилэрэ өлгөмнүк үүнэ, сибэккилии туралларын көрөн  олус астынным уонна сэҥээрдим. Ол курдук үтүөну үксэтэр хаһаайкаларбытынан Мотрена Колмогорова, Августина Александрова, Анна Тимофеева буолаллар. Мотрена кыстатаары киллэрбит сайыҥҥы петуниялара, эустомалара кырыалаах түннүгү киэргэтэн тураллара үчүгэйиэн. Хаартыскаҕа көрбүт эрэ киһи барыта астыммыт буолуохтаах.

Мотрена атын сибэккилэртэн уратыта суох биэбэйдиирин, хаһыс  да сылын сайыҥҥы сибэккилэри кыстатарын туһунан кэпсиир. Кини дьиэтин тэлгэһэтигэр  кыраһыабай сирень мас  үүммүтэ номнуо сэттис сылыгар барда.  Яблонялар, акациялар, оҕуруот үүнээйилэрэ өлгөмнүк үүнэллэрин көрөн,  хаһаайка киэнэ сатабыллааҕа буоларын тута дьиэтин таһыттан быһаараҕын.

Иккис сатабыллаах хаһаайкабыт Августина Александрова, кини дьиэтигэр киирбит киһи барыта сибэкки абылаҥар куустарар. Билигин Августина 40-тан тахса глоксиния араас суордун  олордон боруобалыы сылдьар. Аны саас бар дьонугар бэрсиэҕэ, дьиэтин иһин-таһын сибэкки ыһыаҕынан ыһыаҕа.

Үһүс сатабыллаах Сииттэбит нэһилиэгин хаһаайката Анна Тимофеева буолар. Тимофеевтар дьиэ кэргэттэрэ элбэх сүөһүлээх-астаах, улахан  хаһаайыстыбалаах, оҕуруот аһын толору баһылаабыт, эдэр дьоҥҥо холобур буолар ыаллар. Ыал ийэтэ Анна  сонун сибэккилэри олордорун олус сөбүлүүр. Дьиэтин иһин-таһын киһи сөҕөр элбэх сибэккинэн симиир. Хаһан да көрө илик сонун сибэккилэриҥ, мин кэрэбин көрүҥ диэбиттии өлгөмнүк үүнэн турар буолааччылар.

Дьэ ити курдук Сииттэ сатабыллаах хаһаайкалара сэтинньи тымныытын кэрэ  сибэккилэринэн угуттаан, сылаас тыыннарын бар дьонноругар бэлэхтии олороллор.

Марианна Сивцева.