Көрөөччүнү толкуйдатар «Кэҕэ» киинэ

Ыам ыйын 8 күнүттэн киинэ тыйаатырдарыгар «Кэҕэ» диэн саҥа киинэ тахсыаҕа. Бэҕэһээ суруналыыстарга сабыылаах көрдөрүү кэнниттэн, элбэх ыйытыы үөскээбитэ. Бүгүн пресс-кэмпириэнсийэ кэмигэр киинэни уһулааччылар ыйытыыларга хоруйдаатылар.

Режиссер Евгений Николаев хайдах киинэ устар буолбутун туһунан кэпсээтэ.

— Оҕо эрдэхпиттэн киинэни олус интэриэһиргиир этим. АГИКИ-га үөрэнэн баран, Амматааҕы норуодунай тыйаатырга 5 сыл үлэлээбитим. Онтон Дима Давыдовтыын билсэн, кинилиин үлэлэһэн барбытым. Бодоруһан, иккис аҕам курдук буолбута.

«Кэҕэ» киинэни устарга, икки нэдиэлэ иһинэн бэлэмнэнэн баран,  икки нэдиэлэ иһинэн устан бүтэрбиппит. Тоҕо диэтэр, идиэйэтэ олох эрдэттэн үөскээбитэ. Бастаан кылгас киинэни устарбар, түһээн көрөр этим. Төрүт култуураттан, сиэртэн-туомтан төһө туораатыбыт, туохха тиийэбит диэн толкуй баара, ол сүрүн санааны тиэрдэр баҕалааҕым, — диэн кини кэпсээтэ.

— Бу, дьиҥэ, ыарахан оруол. Ол эрээри, миэхэ оонньуурбар оннук айылаах ыарахан буолбатах этэ. Дьоруой тугу саныырын, бу түгэҥҥэ хайдах-туох олорорун дьиҥнээхтик олоробун, тиэрдэ сатыыбын. Киинэҕэ үлэлэспитим ыраатта эрээри, бу мин бастакы сүрүн оруолум, — диэн Иван Шамаев эттэ.

Иккис режиссер Никита Давыдов повар идэтинэн үлэлээбитин, онтон киинэ эйгэтигэр кэлбитин, үлүһүйэн үлэлиирин кэпсээтэ. Кини режиссер Дмитрий Давыдов быраата эбит.
— Биһигини барыбытын Дима Давыдов ситимнээбитэ. Кини »айар оҕолоро» буолабыт. Бу киинэ сорохторго ыарахан буолуо, ол эрээри айар иэйиини хааччахтаабакка, толору көҥүл биэрбиппит. Женя, бэл, ити дьиэҕэ хонор этэ. Хамаандабыт эдэр, «умайа» сылдьар дьон. Сороҕор сонно толкуйдаан, уларытан, устарбыт, — диэн оператор Александр Красновскай кэпсээтэ.

— Хас биирдии көрөөччү бэйэтин олоҕуттан көрөн, ыйытыыга хоруй буларын, бэйэтэ сюжет толкуйдуурун курдук устубуппут. Элбэх бэстибээллэргэ сылдьыбыппыт, онно эмиэ элбэҕи ыйыталлар этэ. Көрөөччү ис түгэх өйүттэн, бэйэтин олоҕуттан хоруйдары булар. Билигин көрөөччүгэ  барытын ыстаан, бэлэмнээн биэрэллэр. Бу киинэ оннук буолбатах, көрөөччү бэйэтэ толкуйдуурун, хоруй буларын ситиһэр, — диэн режиссер суруналыыстар ыйытыыларыгар хоруйдаата.

— Бу киинэ дириҥник толкуйдуур, эстет дьоҥҥо ананар. »Кэҕэ» киинэ »Кинологистика» хампаанньа, сүрүн продюсер Анатолий Сергеев көмөтүнэн, ыам ыйын 29 күнүттэн Арассыыйа бөдөҥ куораттарыгар көстүөҕэ, — диэн продюсер Яна Байгожаева эттэ.

Үөр кыыс оруолун Бурятия блогера Саяна Банзаракцаева оонньоото. Кини ийэтэ саха. Киинэҕэ уһулла сылдьан, саха тылын үөрэппит.

«Кэҕэ» киинэ, чахчы, көннөрү көрөөччү ылынарыгар ыарахан буолуон сөп. Үрүҥ-хара өҥнөөх, хараҥа фоннаах, саҥа-иҥэ кэмчи, киһи уйулҕатын күүрдэр муусукалаах, сюжетын сорох лииньийэтэ өйдөммөт. Хоррор, эбэтэр, арт-хаус истииллээх диэххэ сөп.

Бу иннинэ киинэ «Зеркало. Философия Тарковского» норуоттар икки ардыларынааҕы бэстибээлгэ «Впечатляющий дебют, который бросает вызов зрителям» анал бирииһи ылбыта. Москваҕа «НСТ Хоррор Фест» IV норуоттар икки ардыларынааҕы бэстибээлгэ кыайбыта.

Былырыын «Одна шестая» Евразия киинэ бэстибээлигэр «Бастыҥ оператор үлэтэ» бирииһи ылбыта. 2023 сыллаахха «Горький fest» бэстибээлгэ Евгений Николаев кылгас киинэтинэн икки наҕарааданы ылан турар. «Дух огня» бэстибээлгэ эмиэ бэлиэтэммитэ.

Суруналыыстар саха киинэтэ атын өттүнэн арыллыбытын, туспа көрүүлээх эдэр, хорсун хамаанда үөскээбитин бэлиэтээтилэр. Саха киинэтигэр бу сыл саҕаланыаҕыттан сэттис премьера буолар.