«Кэрэни көрбүт» Костромаҕа көрөөччү биһирэбилин ылла

«Сахафильм” хампаанньа режиссера Люба Борисова “Кэрэни көрбүт” уус-уран хартыыната өссө биир киинэ бэстибээлин сүрүн бирииһин ылла.

Костромаҕа норуоттар икки ардыларынааҕы «Свой путь» киинэ бэстибээлигэр көрөөччүлэр куоластааһыннарынан Саха сиригэр уһуллубут киинэ бастаата.

Костромаҕа 18 эрдэ сүүмэрдэммит уус-уран киинэлэр куонкуруска кыттыбыттара. Бу иннинэ олунньуга Уфа куоракка бу үлэлэр  улахан биһирэбил ылан талыллыбыттара.
Норуоттар икки ардыларынааҕы «Свой путь» киинэ бэстибээлэ араас дойдуларга уһуллубут хартыыналары түмэн, дойду биллиилээх диэйэтэллэрин иһигэр ырытыыны таһаарар сыаллаах. Бырайыак Бэрэсидьиэн култуураҕа көҕүлээһиннэри өйүүр пуондатын өйөбүлүнэн ыытыллар.