Кэскиллээх тутааччыларга анаан үлэ дьаарбаҥката буолан ааста

Дьокуускайга «Эдэр исписэлиис – кэскиллээх тутааччы» пуорум чэрчитинэн үлэ дьаарбаҥката буолан ааста.

М.К. Аммосов аатынан Хотугулуу-Илиҥҥи федеральнай университеттыын кыттыһан тэриллибит тэрээһиҥҥэ бастыҥ тутуу хампаанньалара, тырааныспар, бырамыысыланнас уонна олох-дьаһах хомунаалынай хаһаайыстыбатын эйгэтин бэрэстэбиитэллэрэ кыттыыны ыллылар.

«Биһиги устудьуоннар үөрэнэр кэмнэригэр  үлэлэрин миэстэтин быһаарыналларын, ханнык сатабыллары сайыннарыахтаахтарын өйдүүллэрин, үөрэхтэрин бүтэрэн баран, табыгастаах уонна барыыстаах үлэни булалларыгар усулуобуйа тэрийэргэ дьулуһабыт», – диэн СӨ Нэһилиэнньэтин дьарыктаах буолуутун Судаарыстыбаннай кэмитиэтин бэрэссэдээтэлэ Светлана Горюшинская бэлиэтээтэ.

Дьаарбаҥка  үөрэхтэрин түмүктээн эрэр устудьуоннарга туһуланар. Кэскиллээх исписэлиистэр бүгүҥҥү күҥҥэ ирдэнэр вакансиялары кытта билсиһэн эрэ муҥурдамматылар, ону таһынан үлэ биэрээччилэр ирдэбиллэрин, наадалаах сатабыллары уонна идэлэринэн салгыы үүнэр-сайдар кыахтарын туһунан быһаччы биллилэр. Тэрээһиҥҥэ устудьуоннарга үлэ миэстэтин эрэ буолбакка, стажировканы уонна быраактыканы ааһар кыаҕы биэрэр баҕалаах 30-ча үлэ биэрээччи кытынна.

Санатан эттэххэ, алтынньы 7 күнүгэр Дьокуускайга «Эдэр исписэлиис – кэскиллээх тутааччы» федеральнай пуорум үөрүүлээх аһыллыыта буолбута.